Die Thermoskuddel

Das Bild zum Gedicht

thermoskanne
Zusammenfassung
76 Die Thermoskuddel

nach einem Witz
Zum Vorlesen hier klicken!

Boidst wissen meggst, wias auf da Woid zuageht,
boidst des suachst, wos in koana Zeidung steht,
nocha muasst an Sundog an Wirtschzhaus sei –
do dafroggst des ois, wos wichtig is und nei!

Da Sepp, da Wast und a da Lois
hucken beinand und debattiern scho a Bois:
Wos der greßte Fortschritt is, den mia dafuntn,
von dem mia am meisten profitieren kunntn.

„S’Auto“ – da Sepp woas des genau!
„Da kimmbst iwaroi hi, i moa des is schlau!
I moa des ku a jeder Blinde segn,
do braucht ma gor nit long mehr iwalegn!“

„Na, na – des Handy“ – moant da Lois,
nachdem a nit vü grett hot, nach oana Bois.
„Kust jeden die gonz Zeit leicht dawischen,
ob’st an Berg obn bist, oder an Schwarzsee außt beim Fischen!“

Da Wast ruck amoi sein Hut gonz zrugg ins Gnack,
und nimmt a oandlene Pris vom Schnupftabak:
„I moa, dass die Thermoskuddl is – na fi mi is des gwies,
dass des die schlaucheste Dafindung is!“

Da Lois, da Sepp mochen a longs Gsicht:
„Warum den des, vazöh die Gschicht!
Da senn ma gsponnt, wos do jetz kimmb,
kinnand ins nit viestöhn, das dein Gschicht stimmb!“

„An Winter bein Schiliftdienst kriag i an hoassn Tee –
der bleib in da Kuddel hoas – und des is schee!
Der koide Soft, den s’Weiwi an Summa eichituat,
der bleib an gonzn Tog koid – und des is guat!

Die Zwoa wissen oiwei no nit, wos jetz do geit
es kimmb er vie, dass bei der Gschicht wos feit!
„Des is a woi koa Erfindung, des is gwies!“
„Woi, woi! Wia woas die Thermoskuddel wonn Winter und wonn Summa is?“

Beschreibungen und Ausdrücke


boidst = wenn Du
meggst = möchtest
Woid = Welt
dafroggst = erfrägst Du
hucken = sitzen
a Bois = eine Weile (Zeit)
greßte = größte
dafunten = erfunden
iwaroi = überall
iwalegn = überlegen (nachdenken)
grett = geredet
zrugg = zurück
Gnack = Genick
oandlene = ordentliche
Pris = Prise
is des gwies = ist das sicher
Dafindung = Erfindung
vazöh = erzähle
gsponnt = gespannt
Weiwi = Kosename für Ehefrau
eichituat = hinein gibt
feit = fehlt
gwies = sicher