Fake News

A Leiden der heitigen Zeit is, dass ma nix mehr daboaten,
die Wirtschaft woas des natürlich a zun loaten!
Ois muas sofort und möglichst gestan sei,
dawei soid die Vorfreid eigentliche des scheenste sei!

Im Spadsumma hommb’s den oiden Schnee u’tu,
is scho a wenk bsunna, wia i die Schneebandl g’sechen hu,
a „Ski-Opening“ Mitte Oktober – wia’s des nennand,
sie kinnands nid daboaten, dass wieda Schifohn kennand!

Im Oktober gibbs die easchten Weihnachtskeks zun Kaffen,
ma siecht, wia die Leit sie direkt darum raffen!
Die Weihnachtsfeian organisian, oi woind’s vadean,
fie koan ku’s schnoi gnuag amoi Weihnachten wean!

Ois muas a „Event“ sei, wo d’Musi laut plead,
wei onscheinend neamb mehr gean des Stade head,
oafoch hilosen, wieda a bissei wia a Kind sei,
die Soi zur Ruah kemma lossen, des waar decht fei!

Zur Weihnachtsg’schicht taten’s heit „Fake News“ sogen.
Natürlich wissen mir, die gonze Gschicht, die is dalogen
und decht sehn i mi noch da Vorfreid, auf des Boaten,
mecht die Sponnung auf den groaßen Tog hi loaten.

Keks bochen, s’gonze Haus schmeckt so guad,
Christbaam kaffen, an Weihrauch in die Gluad,
mit die Kinda rodeln geh im tiafen Schnee,
boid die Augen leichten, die roden Wangei, des is schee!

Keschzn u’zintn, die so vüh Ruah ausstroihn,
zuaschaugn wia die Kinda fie die Eltern a Büdl moin,
i schaug’s oiwei wieda gean u, bi froh, das i dia hu,
wor a scheene Zeit, denk mid a bissei Wehmut dru.

An Fernseher o’schoiten, an offna Kamin u’zinten,
wieda amoi Zeit fie an Ratscher finten,
wos Guad’s zun Trinken, a poor Kesten o’broden,
oder a wieder amoi a poor Freind ei’loden.

Des is fie mi Weihnachten, ois zur krechten Zeit,
nid wia deppat durch die Gschäften laffen war hoid g’scheit,
a Kloanigkeit schenken, zoagn wen ma mog,
donn is da Heilige Obend a scheena Tog.

Vielleicht findst an Abstand, wenn’s da nid guad geht!
Rea a Lacki, los die Tränen zua, boid’s nid guad steht!
I winsch da, dass’d aus deina Traurigkeit aussakimmst
und dass’d in dein Leben an noien U’lauf danimmst.

Wenn ois passt, genieß die schee Zeit,
vaschenk gonz vüh Liab – des is des Beste wos geit.
Schaug, dass’d gonz vüh davu im Heaschzen middanimmst,
damit’st weit iwa die Feischtog damit ummidakimmst.

Den mehran vo ins geht’s heit so guad,
i find, es is richtig, dass ma driwai nochdenken tuad!
Des is, warum i oiwei no a richtige „Fan“ vo Weihnachten bin,
do mochen ausnahmsweis a amoi die „Fake News“ an Sinn!