Schuiufong

Kaiwi

Jetz kimmb wieder die scheenste Zeit,
wo’s nit so hoas ist und decht fü Sunn ogeit.
Do muast aussi – insre Berg send so schee,
a wenk schaugn, nit hasten, schea gmiachlich gee.

Wia i um d’Reib ummikimm, kimmb a Kua daher!
Zeascht oane, nocha zwoa – es weand oiwei mehr,
oane scheena wia di onare, ma sicht’s es geht ea guad,
Send sauwa, do is no a Oiwinger der si die Orweit utuad!

Owa gonz bsonders schee is – des foid direkt auf –
die Kia hommb richtig scheene Heana auf!
Schaugn nit so komisch und deppert drei,
so soid a Kua ausschauggn – genau so soin’s sei!

I woas schon, es is, dass an Lafstoi nit die onan pfocken,
dass ningascht ueggn und brav in eana Boxen hocken,
owa i muas sogn, es is schee, dass Kia mit Heana geit!
De krotz i gean zwischen die Augn, wei mi des gfreit.

Die Ferien send wieda vorbei,
die Easchtklassla send s’easchte Moi  dabei,
die Aufregung is gross – reden oi durchanond,
schee u’zochen – ma sicht‘s, des is a Markengwond!

I woas nit, warum mia di Gschicht mit d’Heandln  in Sinn kimmb
und warum mi des so traurig stimmb,
irgendwie kimmb ma vie, bei vühnan hommb’s  Heandl obrennt
damit’s gfiarig zun Hoitn send – wia ma des vo   die Kaiwi kennt!

Loss ma ea d’Heandl woxen, mia soidn ins mit die Kinda mehr plogn
und den Junga  learna damit umz’geh und eana sogn,
wia’s vaontwortungsvoi mit enara Kroft umgeh –  owa nit oiwa ducken,
Rückgrad zoagn, nit feig in da Eggn hucken!

War hoit guad, wonn’s dahoam nit im Lafstoi send,
dass a so a kloans Kaiwei a die Freiheit kennd!
Soichane Kaiwin deaffn ruhig amoi a wenk iwamiatig sei –
donn tat ma wieda an Glonz in die Augn segn –  des war hoit fei!

Zusammenfassung

144 Schuiufong 2009

ein etwas wehmütiger Vergleich mit den kleinen Kälbern und dem Abschneiden der Hörner zum Schulanfang

Type: nett, philosophisch

Beschreibungen und Ausdrücke

hoas = warm, heiß
fü Sunn ogeit = viel Sonne gibt
d'Reib = die Kurve
zeascht = zuerst
Oiwinger = Almhirte, Senner
Orweit utuad = sich die Arbeit macht
foid auf = fällt auf
hommb = haben
Heana = Hörner
Lafstoi = Laufstall
onan = anderen
pfocken = stossen, stupsen
ningascht = nirgends
ueggn = anecken
krotz = kratze
Easchtklassla = Schulanfänger
s'easchte Moi = das erste Mal
u'zochen = angezogen
bei vühnan = bei vielen
obrennt = abgesengt, abgebrannt
gfiarig = einfach
zun Hoitn = zum Halten (beaufsichtigen)
Kaiwi = Kalb
plogn = anstrengen
soichane = solche
deaffn = dürfen
iwamiatig = übermütig