Wossa

299 Wossa

Ma liest, dass hoia extrig vüh Leit an da Gripp erkronken
und dass ma des an foischen Impfserum vadonken!
Sie homms nit daroden, da Virus is mutiascht,
wos zu dersen groaßen Grippewelle fiascht!

Am Wiaschtzhaustisch redn’s des krod o,
da Huwa-Sepp, is a scho do,
er hoit von Impfen iwahaup nit vüh,
wei er an die Wirkung von dem Teifiszeug nit glabn wüh!

„Boid’s an Mogen unten a wenk feit
bi i froh, dass a Bluadwuschzschnapsei geit!
A drei oder vier Stampal, donn is ois guad,
wei des den Mogen beruhigen tuad“

„Bein Hoisweh tua i an Zugga an Obstla eichirian,
hoassmochen und longsom in den Mund einfian,
so hoass wia miggla muast des oichischlinten,
nocha brauchst di weng an Hoisweh nid long schinten!“

„Noch a poor Krautinger is die Gripp vaschwunden,
es gibb zwor Leit, die den nid trinken kunten,
gegen Depressionen oder oachfach nur fie d’Schoas
da Krautinger heilt des ois, wia ma jo woas!“

„An Weißwein eichi Damianablattln und a Weidenröschenkraut,
Brennessl mit Woinussblattln kochen, damit’s mit da Liab hihaut,
dazua no a poor Obstla, do weascht die Sicht vakleanscht,
do kust donn sicha sein, dass da Sex guad weascht!“

„Du kennst di so guad aus, drum tat i Di gean frogn:
Sepp, wonn und gegen wos trinkst a Wossa, kunnst ins des sogn?
Da Sepp denkt kuschz noch und nimmb a Schluck von Bia:
„Des ku i da jetz gornid sogen, so krank wor i no nia!“

Zusammenfassung

299 Wossa
Gedicht Juni 2015

nach einem Witz



Bildrechte TVB Wildschönau

Type: witzig

Beschreibungen und Ausdrücke

hoia extrig vüh = heuer extra viele
an foischen = dem falschen
vadonken = verdanken
nit daroden = nicht erraten
fiascht = führt
Wiaschtzhaustisch = Wirtshaustisch
redn's des krod o = sprechen sie darüber
Bluadwuschzschnapsei = Blutwurst-Schnaps
an Zugga eichirian = einen Zucker einrühren
hoassmochen = heißmachen
so hoass wia miggla = so heiß wie möglich
oichischlinten = hinterunterschlingen/-schlucken
Krautinger = Rübenschnaps - Spezialität aus der Wildschönau
es gibb zwor Leit = es gibt zwar Leute
nid trinken kunten = nicht trinken könnten
oafach nur fie d'Schoas = einfach nur für die Winde (Flatus)
mit da Liab hihaut = es mit der Liebe funktioniert
vakleascht = verklärt