„Griaß di Sepp, sitz Di decht an Moment zu mir,
nocha geh i den Bericht gach durch mit Dir.
Die Gsundenuntasuachung is ja wichtig,
dass’d regelmäßig kimmst, des is scho richtig!“

„Wos homma do – bein Bluatdruck bis’d guad ochakemma,
tuast ma die Tabletten brav weidanemma!
Mit’n Harnsäurewert is so a G’schicht,
boidst beim Bier nit aufpasst, droht da die Gicht!“

„Bein Zugga muast des Saufen no a wenk einschränken,
und bei die Kohlehydrate an die Menge denken!
Mehr Gmias, Fisch essen und vor oim Wossa trinken,
nocha weascht da Bluadzuggawert no weida sinken.“

„I woas scho, die Prostatauntasuchung is nit fei,
owa in dein Oita is des wichtig, da muass des sei,
schaut owa guad aus, da Druck is guad bein Soachen
des is neben dem PSA-Wert a ganz guads Zoachen!“

„Ois in oim schauggs nit schlecht aus wia i hoit moan,
soggst ma da Lisi an scheen Gruaß dahoam!
Mia kimmb vieh, Du host no wos – host Du no Frogn?
Nur aussa damit, mia kust ois sogn!“

„Herr Dokta, ebbas plogg mi no, kus nit begreifen:
Boid i mit meina Lisi Sex hu, fong’s in die Ohren u zun Pfeifen!
Des steascht mi scho – vielleicht kust ma des erklean,
i mecht gern, dass des weckgeht, es soid zumindest bessa wean!“

Da Dokta lachid a wenk und nickt verständnisvoi,
denkt noch, wiara des dem Sepp guad ummibringa soi:
„Na Sepp, in Dein Oita – ich sogs gonz offen,
brauchst bein Sex auf koane „standing ovations“ mehr hoffen!“