Da Sepp geht in da Kirchen hin und her,
wia’s beichten geht, woas a nimma mehr,
er fand’s owa passend und a schee,
mecht bei da goidan Hochzeit ospeisen geh.

An galing nimmb a si a Heaschz und kniat si nieda,
da Pfoara schaut gnädig, er is jo nit zwieda:
“Mein Sohn, was führt dich her zu mir,
fang einfach an, ich helfe Dir!

Hast des Nachbarn Frau begeascht?
Host g’logn, g’stoin, bi ma sicha das da do wos einfoin weascht!
Denk einfoch nach, vertrau dem Herrn
weascht sechen, des weascht gonz oafach wean!”

“An Nochborn sei Frau is schiach, do is ois spad!
Owa an Viechhandla hu i a kronke Kua u’draht!”
“Bet zwei Vaterunser, und dann vor oien
nimm Dir ein Herz, Du musst bereuen!”

“Bei da Förderung hu di Wohrheit a wenk vabogn,
und bei da Oimfläche hu i gonz oandla g’logn!”
Zwei  “Gegrüßtet seist Du Maria” scheinen ma  da richtig
und bereuen musst, das ist wichtig!”

So gehts no weida, da Sepp tuats Heaschz ausschitten,
und fie seine Sinden beim Pfarrer um Vergebung bitten,
zun Schluss weascht eam ois vagebn
er bereiht die gonzen Sinden vo sein Leben.

Dawei a draußt in da Kirchbonk kniascht,
sicht ma, an Sepp plog no wos, er is nit konzentriascht!
A hostig Kreizzeichen, da Beichstuih is no frei
und ruck zuck is a hintan Vorhang drei!

Da Pfora dakimmb, frog si was soid des blos!
“Und vaheirat bi i a!”, sog  da Sepp gonz atemlos.
“Ich glaube nicht, dass das eine Sünde war!”
“Des woas is scho, owa berein tua i des gonz schwar!”