Die Politik fong u langsam zun kapian:
Die Landflucht weascht iwa kuschz oda long no dazua fian,
dass ma am Land z’wenk Leit hommb und des wa bled,
wei’s do um Steiern vie die Gemeinden geht.

„Familienförderung“ – des is die geheime Woffen!
Damit hoffens, dass die empirische Umkehr schoffen!
Bei vier Kinda pro Familie gibb’s oandla Goid,
da Sepp liest des, ma sicht, dass eam des guad gfoid!

Muas mit seiner Lisi reden – beicht ihr die Sint:
Er hot bei da Nachbarin der Huwabeirin a ledigs Kind!
Kunnt’ns des no zu eanare drei oagna in die Familie aufnemma
wuscht’ns zu an oandlan Batzen Euro kemma!

Schlussendlich und unter Tränen stimmb die Lisi zua:
„Oft geh‘ hoit ummi und hoi den heita Bua“!
Da Nochbor war sauer – des wor a Gstried!
Mit ona Beteiligung weans decht hondl’s oas – da Bua kimmb mit.

„Lisi! Jetz weascht ois guat – jetz weascht die Kassa stimma!
Mia weand die nächsten Johr in Euro schwimma!“
A da Stubn is stad – die Lisi reascht,
er gwoscht, dass aus dem guadn Gschäft nix weascht.

Die Lisi schamb sie – des hot a gspiascht,
irgendwas is dawei a weck wor dahoam passiascht!
„Es weascht nix wean mit Woihstand und mit’n Goid,
da Schwenterbauer hot seine zwoa Buam vo eam bei mir o‘khoid!