Boid zwoa a Kind kriang, donn ändert si gonz vüh,
es fong a nois Leben u, wenn ma so wüh.
S’Buzei voi Liab in Orm nehma, trösten wenn’s reascht,
bei da Entwicklung zuaschaun, wonns donn gressa weascht,

es gibb so vüh Biacha, sicher oi gscheit,
wos ma nit toa soid, wos ma scho tuat, wonn wos feit,
i moa owa – und des waar mei Rot,
des weascht oft vagessen und des is schod:

Pass auf, wost higehst, pass auf wost tuast,
weist owei dabei denken muast:
Zwoa kloane Eigei vafoign Dei Toan!
Denen entgeht nix, wia i hoit moan!

Zwoa kloane Haxei foign Dein Tritt
und beobachten Di bei jedem Schritt,
merken, dass si die Ehrlichkeit nit teilen losst,
und Du die guadn Vorsätze nit umg’setzt host!

Da hüfts nit vüh, wonnst große Reden schwingst,
oda moast, dass’d mit gscheide Sprich wos gwingst,
nur wos die kloan Eigi sechen, des is wos zöht,
nutzt nix, boid des große Vorbüd föht!

Da Muattatog gib ins zun Iwalegen die Gelegenheit,
iwa die gemeinsame Zeit nochdenken is donn gscheit,
Dei Heaschz soid sie mit Liab u‘ fühn, boids an die Ötan denkst,
und Deina Mama a Streißei Himmischlissei schenkst!

Des Ideal erreichen is so schwar!
War jo oafach, boid nit des tägliche Leben war,
so owa zöht nur, dass ma des gegenseitige Bemiahn erkennt,
des is, wos ma gemeinhin „die Liebe“ nennt.