Von guaden Hoiz aus insre Bam moch ma die Breda,
de schützen insa Haus vor jedem Weda.
Des schlechte ku an Winta in Kachiofen kemma,
owa ma ku’s a zum Spanplattenmochen nemma.

Aus da Müch geits Butter von guaden Rahm,
oda mia mochn an Oimkas krod wia bei de Bam –
wos iwrigbleib, weaschd a hergnumma:
Mit da Mogamüch und dem Jutten fuadan ma die Fokken iwan Summa.

A da Zeidung kust es iwaori lesen:
Auf da Pizza is koa richtiga Kas mehr gwesen,
die Schrimbs send aus Fischabfoi – des kust vagessen,
des tat’nd bei ins nit amoi die Fokken fressen!

Da Kaffee is aus an billigen Puiva mit Chemie
und so geht‘s weida – mir kimmb vie,
d’Menschheit denkt nur mehr an des Göd –
Profit is des oanzige wos zöhd auf dera Wöd!

Da Profit kimmb auf die Bank, damit a no mehr weascht,
de hommb owa ois vazockt, da nutz’s nix wonn’st   jetzt reascht!
Jetz miass ma wieda oi den Gürtel enga schnoin
und in a poor Jahrl vü mehr Steiern zoin.

Mit de Steian weascht die Müch und’s guade Fleisch  subventioniascht
und mia essend des Spanplatten-Food – es is scho gstiascht!
Wenn ma jetz insan eigenen Scheissdreck zun Essen  aufbereiten kunnten
hät ma des perfekte Profit-Perpeto-Mobile erfunden!