S'Privatguadochten

helm

Im Winter wor da neiche Trend,
das gonz fü Höm auf da Pistn send.
Die Pisten send eisig, oi foand z’rasant,
so dass si si bei Hinkugeln an da Birn wehtant.

Bein Radlfoan gebn’s ins den Rot,
dass um des Grid und um des Hirn war schod.
Es is wichtig, dass’d an Hölm aufhost,
boidst mit’n Bike an Berg oichiblost.

Guat fufzg Joahr hot mei Birn scho iwastondn,
zwischen die Oarwaschl is no ois (mehr oder weniger) vorhonden,
nochdem i grundsätzlich nit ois glab, wos so vazöhn,
hu i ma denk, i muas a Privatguatochtn erstöhn.

So oite Hoim send ja gnuag umma,
drum hu i mir a so a Kochi und a Zipfihaubn gnumma
und hu ma denkt, von Huawabräuturm geht des gwies
wei der des hexte Gebäude weitum is.

Zerscht hu i mir amoi a Paarl Wischtl bestöht
mit vü Senf und Kren – da isst oandla vie dei Göd!
An Radler und a Schnapsei – i hu jo Zeit
weam ma schaugn, wos do fir a Überraschung geit!

Oft bi i aussi aufn Balkon – des wor nit fein
boids so weit oichegeht, derfst nit oschauscheich sei!
Di oa Hond am Glander – an Hoim in der Linken,
i trauat ma nit amoi die Leit untn winken!

An Hoim auslossen, i hear’s wira foid
und unten auf’n Asphalt aufschnoid.
Schaug vorsichtig oicha – vom Hoim bleimb nur mehr Splitter
boid da a Kopf drinn gwen war – ja des war bitter!

Jetz moch ma d’Gegenprob, die Zipfihaubn schea bunt,
schmeiss s’iwan Balkon – gonz stad schweb’s noch unt.
Lont – gonz perfekt, ma heascht iwahaup nix
drum ist die Sach fi mi zu hundert Prozent fix:

Mit dem Gredat von die Hoim tand’s iwatreibn –
i wear decht bei meina Zipfihaubn bleibn!
Gonz ogsechn vom Aspekt der Elegance
hot da Hoim gegen mei Zipfihaubn iwahaupt koa Chance!

Zusammenfassung

46 S'Privatguadachten

nach einem Witz - warum die Wissenschaft irrt

Type: witzig

Beschreibungen und Ausdrücke

Höm = Helm
foan = fahren
Hinkugeln = Hinfallen
Birn = Birne, Kopf
Grind = Gesicht
boidst = wenn due
Bike = Mountainbike
oichiblost = hinunterrast
fufzg = fünfzig
iwastondn = überstanden
Oarwaschl = Ohren
vazöhn = erzählen
oite = alte
Kochi = (Nacht-)Topf
Zipfihaubn = Zipfelmütze
hu ma denkt = habe mir gedacht
Huawabräuturm = Huberbräuturm (lokale Brauerei)
hexte = höchste
Zerscht = zuerst
Wischtl = Würstchen
oandla = ordentlich
fira = für eine
boidst = wenn du
oichegeht = hintergeht
oschauscheich = nicht schwindelfrei
Glander = Geländer
aufschnoid = aufprallt
stad = still
lont = landet
heascht = hört
iwahaup = überhaupt
Gredat = Gerede
tand's = tun sie
iwatreibn = übertreiben
ogsechn = abgesehen