Mia Manndaleit, mia hommb’s scho schwar!
Boid krod des Testesteron nit war!
Vo Friah bis Spat – es is nit zun Lachen
güt’s nur, die Weiberleit a Freid zun Machen!

Da Oa frisst Anabolika und geht trainiern,
mecht, dass die Dianei die Muskeln gspian.
Da Onare kreid ohne Soi durch’n Iwahang,
sie steht herunt – ihr Heaschz schlog fi eam und is gonz bang.

Dia, dia wos sie gornimma richtig gspian,
dia tand U-Bahn-Surfen – do feit’s woi a wenk im Hian!
Die gwissen Dianei gfoid des – des is Schneid!
Nur boid er an Strom kimmb, des is dann nit so gscheit!

Mit’n Auto „Gummi gebn“, wia a Wüdsau fohn,
an Haufen PS, die Kisten tiafa legn, des ku nit schodn.
Und iwaroi send’s dabei – die Kidei wia a Gürtel schmoi,
durch’n enga Pullover siggst ondla s’Berg und Toi!

Boidst vaheirat bist, weaschz a wenk kringa.
Derfst die nit geh lassen – muast di owa a nit oiwei zwinga!
A diam amoi a wenk aufzoagn – des muas scho sei,
boid’s die dahoam a wenk bewundern, is des scho fei!

I hu a Maschin dahoam – i sog da, do tat’s schaugn!
i moa de tat dir a no taugn!
Des Wunderwerk is mei Bodezimmerwoog:
De geht von Null auf Hunascht unter oana Sekund – won i das sog!