Page 18 - Gesamt 2019

Bitcoin

Da Sepp schaugg mit Sorge auf seine Finanzen,
er hod des G'füh, dass'n die Banken pflanzen!
Es gib koane Zinsen, die Rent'n stagniascht,
wos zu ona Frustuation beim Sepp'n fiascht.

Vo da Regierung is ja a nid vüh z'daboaten,
vou den Woihn woin's oiwei Göd auf die Renten loaten,
is owa wia bein Eichenhoflift, wo's da an Osch aufhoatzt,
weascht owa schnoi wieda koid, boidst a boisl boat'st!

Er geht zu oana Veronstoitung vo nan Finanzberoter,
de helfen eam, die Hoffnung hot er,
roden eam, er soit Bitcoin's kaffen - unbedingt!
Wei des zum Reichtum fiascht und so vüh bringt.

Er hebb s'gonze Göd o vo da Bank und dräng sie fie,
kafft Bitcoins und plattelt s'Borgoid hie,
er kriag an Zeddel, do weascht'z Weiwi schaugn!
Jetzt weand's reich, hommb ausg'sorgt, des tuat eam taugn!

A Boisei geht's steil bergauf mid die Finanzen,
dauascht nid long, da Sepp moand sie woind'n pflanzen,
des Konto weascht oi Tog weniger, es is ois weck,
sie send auf oamoi orm, er kriag an Schreck!

Di TIWAG-Rechnung, die Ortswärme owa a des Essen,
fie nix glong's Goid, des kust vagessen!
Die Briaf mid die Rechnungen mochen's nimma auf,
sie kemmand in a Schochtl mit an Decki drauf.

Auf oamoi leit's, sie hommb eana an Exikuta g'schickt!
Er stöht sie fie, mecht eichakemma, da Sepp der nickt.
Da Fernseher, da Radio, owa a da Schmuck,
iwaroi pickt da Kuckuck drauf, d'Lisi hoit die Tränen z'ruck.

18