Page 58 - Gesamt 2019

Aloa

Boid ma auf d'Wöd kemmand, geht's ins guad,
do is d'Mama umma, die fie ins ois tuat,
do bist nia alloa, Glück is auf a poor Sochen reduziascht,
regelmässig wo's z'Essen und dass'd die Liebe g'spiascht.

Kindagoscht'n, Schuizeit, soziales Leana,
a do is G'füh vo Einsamkeit no kleana,
obwoi's scho viekimmb, dass ma si in a Eck vadruckt,
oda vazweifid in sein Kammal huckt.

Donn kimmb die Zeit, do wü ma's wissen!
Ois wo's vo die Dawoxna kimmb, des fint ma g'schissen!
Do is nocha so richtig do - die Einsamkeit,
dass si ebba um di kümmat, find'st des waa gonz g'scheit.

Muast Erfahrungen mochen, die oft bitta sand
und sie in a junges Heaschz tiaf einbrenna tand.
Wenn da Hormonspiagl sinkt, donn weascht oft klor,
dass die Entscheidung zu oan Partner nid richtig wor.

Owa irgendwann is donn soweit,
dass iwahaupt keine Zweifi geit:
Mit dem oder ihr bist des gonze Leben nimma aloa!
Is jo a wundascheene Entscheidung wia i moa.

Die Zeit nogg an der Gemeinsamkeit der Paa'l,
die Einsamkeit kimmt wieda z'ruck noch a poor Jaa'l,
des Verbindende geht valoan, die Kinda send aus'n Haus,
s'Alloasei in da Ehe bedeit jo immer öfta s'Aus!

Einsamkeit is, wennst vo dir soiwa davulaffen wüst,
oiwei ebban brauchst, dass di nid alloanig fühst,
is nid oafoch, mid sich soiwa z'frieden und glücklich z'sei,
prowias, geh in die Natur, a wenk loslassen des is fei!

58