Kevin, i woas es is Sunntog, dei Schui is zua,
du muast owa decht aufsteht, mei liawa Bua!
Kunnst ja ruhig a amoi a wenk dahoam mittoa!
An Gschirrspüler einrahma waa nid bled wia i hoid moa,
oda den Mull oichitrogen tat a nid schod’n,
nid nua ummaliegen, des tat i dir rod’n!
Mia hommb extra bei der A1 a Modem kafft,
damit des W-LAN bei ins dahoam guad lafft!
Waa owa fie d’Schui und zum Aufgob mochen
und nid zun Computaspühn und onare blede Sochen!
Mit dia gonzen Chips und Zuggawossa aus da Dosen,
weascht oiwei blaada, passt boid nimma in die Hosen!
Ja eh, da Papa is beim AMS, hod onare Pläne,
er kriag owa Orweitslosengoid – des is des Scheene,
owa mia kunnt’n Sochen erledigen, die long scho lieg’n
und die Langweile in Griff kriagen und besieg’n!
Klaub decht deine Socken und Untahosen zomm!
Damit ma wenigstens a bissei Ordnung homm!
Schau da Papa rammb seine Bierdosen jo a brav weck,
mia dasticken jo no im eigenen Dreck!
„Geh Mama, i mog oafoch nur ummahucken,
siggst nid, mid mein dicken Bauch ku i mi nimma bucken,
i mog nid leana – die Matura is fie mi koa Züh,
ku jo noch da Schui a zum AMS geh, wonn i donn wüh!
I hu koa Lust mid insan Hund an Woid aussiz’geh!
So nix toa, a wenk fernsehen, des is decht schee!
Wenn ma wos brauchen, kinna ma’s Online kaffen,
und daspoon ins damit in die G’schäfft’n z’laffen!
Oiso i find, a wenk ummasumsen is nit so schlimm!
I ku an gonzen Tog Handy schauen, mia is gleich, dass i nid aussi kimm!“
„Kevin, i fircht, wennst du amoi a Kind wüh’st und aso weidatuast,
dass du mid deiner Faulheit amoi a Schwongane heiraten muast!“
