Da Andreas Hofer mit sein Boschd is hoia iwaroi zun Segn,
auf’n Kas, auf’n Bia, a Hofer-Wuschd is in die Auslogn glegn,
vou 200asch Johr hommb sie die Schützen tapfer gweascht
und an Feind an die Grenzen an Weg o’gspeascht.

Die Franzosen hommbs vo Südtirol auffagload,
die Boarn hommb an Soizburgischen ausst’n boat –
mit da Kommunikation is drunter und driwa gonga,
koana hot mea gwisst, soid ma no an Kriag ufonga.

Die tapfern Bauern hommb gmoand, dass Tiroi retten weand,
is owa a Bledsinn gwen – homma in Geschichte gleand!
Zun Schluss wor ois ummasiehst, es worn an Haufen tot,
die Tiroia hommb ois valoun – es wor die groasse Not!

Bei die Zoitfest sicht ma wia d’Leit auf die Bänk obn stehn
und mit Inbrunst mit da Musi mitgehn
wenn’s „dem Land Tirol die Treue“ spühn
und sie ganz ois richtige Tiroler fühn!

Oi Nationen sind da dabei, es is gelunga
DEN Krieg homma nach 200asch Johr gonz sicha gwunga!
So weaschtz zwoar nit in die Geschichtsbiacha steh
owa i find die Lösung trotzdem genial und schee!

Vielleicht soid ma des Rezept an Nahen Osten varrodn –
vielleicht brauchat ma do unt donn nimma so vüh Soidodn!
A schneidige Musi, a Paarl Wischdl oda a Kotlett
weck mit die schwaschzen Hutten, a nett’s Dirndlgwandl  war nett.

Vielleicht mitnand a poor Weissbiar zischen
und die Amerikaner mit die Taliban a wenk durchimischen.
I bi ma sicher, dass si nocha koa mehr in Himmi  sprenga wean
boids sechn, wia bärig dass is auf insra Ean!