Advent, des is fie Kinder a scheene Zeit
wo’s krod bei ins so nette Traditionen geit!
Mit’n Opa umman Christbaam an Woid aussi geh,
der Duft vo die Keks a da Kuchi, des is schee!

Oda bein worma Kochiofen zuachiloahn
boids draussen sturmb, Du woast scho wos i moan!
Mit da Oma a Biachi lesen auf die Knia,
des sand so Sochen, die vagisst ma nia.

Da Franzei is acht Johr oid, da Hansi zehn,
derfen zu Oma und Opa gehn
und iwanochten, des tan’s gean,
wei d’Ötan a wenk feian und spat hoamkemma wean.

Wieda amoi an Heiboden obn hupfen,
sie gegenseitig oichischupfen,
eichikuglen, liegenbleiben, schmecken,
die Spinnwebn zuaschaun auf da Decken.

Auf’d Nocht weaschtz zum oichizwogen,
die Oma mecht gean, dass a Gebet aufsogen.
Dahoam is des jo nimma recht dabrauch,
de zwoa kinnans owa scho, se send ja schlauch!

“Müde bin ich, geh zur Ruh”
da Franzei schaugg die Oma u,
sie schaugg z’friedn, wira bet da Bua
“und mach jetzt meine Äuglein zua”.

Bett feschtig, gib an Hansi an Schupfa mit’n Fuaß,
damit a woas, dass a s’Kreizzeichen mochn muas,
ma moand, er hot sei Soch jetz tu,
do fong a no amoi zum Beten u!

“Und liebes Christkind, bring a Smartphone hoia,
de sand jetz in Aktion und drumm nit toa,
und “Die Siedler online” warn a nit bled
so wias auf mein Wunschzeddl obn steht!”

“Warum schreist denn so?”  da Hansi kus nit vasteh,
“des muas decht a mit normala Lautstärk geh!
Des Christkind is jo nit derisch, tat i moan!”
“Na eh nit, owa da Opa miassat siest s’Hörgerät eichitoan!”