Neilich hot der Pfarrer gwedat, dass der Herrgott find,
dass insa Lebenswandel is a Sind.
Dass ma d’Woid versauen, nur saufen und fressen,
und auf die orma Leit vergessen.

Von Fegefeier und dass a da Hö hoass is
und dass ma brodn wearnd am Spieß,
nix z’Essen gib’s und nua schiache Mannaleit send umma,
oft hu i nachdenkt, hu bereut und mia des ois zu Herzn gnumma.

Von Himmi hot a ins verzöd,
dass ob’n ois gratis is – do brauchst koa Göd.
Auf jeder Woik‘n toand singande Engel hucken,
ums weiße Broud und Honigwein brauxt die nur bucken.

I los guat zua, wos er verzöd!
Owa eigentlich hu i mia des ois onascht vigstöd!
Hu ma denkt, dass Schweinsbrodn und Bier kust oiwa hoin,
fesche Weiberleit laffn umma, die oiwa woin!

Aufsteh wannst mogst, bei koana Orweit muast schwitzen,
a da Friah bringans d’Zeitung, kust glei an Goschtn sitzen,
d’Sunn scheint oiwei, is nia koid – es gib koan Regn,
es gib koa Armuat – des war a Segn!

Owa hoit! – is des scho, was i gern mecht?
An gonzn Tog nixtoa – des wa ma nit grecht!
Kunnt mi nia gfrein, wann’s Tagwerch wor guat,
wissat nit, wia guat noch da Orweit a Bierl tuat.

A Fleischkassemmi, mit Senf und des kuschz voun Essen!
Boid’s a nit gsund is – owa da kust des Himmizoig vergessen.
A Käsekrainer oder vom Hoizherscht aussa a Bradl,
oder gonz oafach oamoi Kraut mit Bladl.

Boids ausst a Sauweda hot und es is saukoid
und zruckkimmst gonz dafroun von Spaziern im Woid,
a worma Kachiofen und nachand Haxen uichihem!
I moan no was Besseas kus bein Himmdati obn nit gebn!
 

Samma frou, dass ma bei ins nur oa Frau hommb!
Denk dru – mehrers Schwiegermuta’n warn verdommb!
Owa boid de oane auf d‘Soch schaut und di so liab wia d‘Mei,
no scheena kus an Himmi obn nit sei!

Je länger i nachdenk, desto mehr woas i s‘gwies:
Vo mia aus is an Himmi auffi no koa Gries!
Enck gonz klor sagn, des scheint mir Not
“I glab an a Leben – aber no voun Tod!”