A da Pfarrkirch weascht a Hochamt gfeiert,
so oas, wo da Pfarrer ois in Lateinisch leiert
und dazua a no a wenk foisch sing
und doscht und da a Ministrant dazua spring.

Da Franzei huckt direkt unterm Predigtstui
vo dem was da Pfarrer da so red vasteht a nit fui!
Longweilig – nur so ku ma die Situation beschreibn,
er mog owa nit aus – er muas no bleibn.

A Boisei hüft eams Nosenboun –
er stiescht a da Nasen gonz valoun,
draht’s zwischen d’Finger bis der Rotz is truckn
und schießt die Kigei an die easchte Reih, wo d’Diandln hucken.

Oft galing hoit a an Rosenkranz aus da Hosen,
tuat nebenbei iwa eam auf d’Predigt losen,
woas owa nit, wos der Herr Pfarrer do so moant,
boid er von dem Schlimmen red, woas die Junga an Bett in toant.

Er spüt mit’n Rosenkranz – draht’n um die Hond
und schwenggetzt die Kugeln ummanond.
Da Pfarrer schaut vo om bes zua,
da Franzei gwoscht’s nit und gibt koan Rua.

Vo da Stiagn ocha bleib a no oamoi steh –
muas sogar zwoa Schritt zum Franzei higeh
und ermahnt eam sanft: „Ehre Deinen Rosenkranz!
Jede Perle symbolisiert einen Heiligen, lieber Franz!“

Die gonzen Leit drahn si noch’n Franzei um-
mei – is des dem Franzei z’dumm!
Gonz heilig muas a d’Hantei foitn
und gonz ruhig tuat a an Rosenkranz hoitn!

Die Gloggn leitn – die Wandlung is glei vi,
der guade Vorsatz und die Andacht is schon long dahi!
er schwing an Rosenkranz iwan Finger – eam reicht die longe Stund
und flüstert: „So Manda – jetz hebb’s enk guat u – wei jetz geht’s rund!“