Auf da Hochoim dann d’Vicha schon hibbsch ummarupfen,
zwischen die Kuapflorrn und die Hämas ummazupfen.
Auf da Niederoim wa’s Gros so schee,
d’Rindvicha brauchad’n nur oichigeh!

Owa do is da Weiderost – davor bleims’ steh –
da traun sie si nit driwageh!
Dawei war’s nit so schwar – es is scho gstiascht!
Wor no koane schneidig gnuag – hot’s koane no prowiascht!

A jeder vo ins hot a von so an Weiderost glearnd
und auf wöcha Seit von Weg dass mia hiekearnd.
Die Schui, die Kirch, die Ötan – sie moanand’s ja guat –
vazöhn, wo insa Platz is, wos ma derf oder ebn nit tuat.

I ku da nur rotn – trau di – sei nit scheich!
Steig auf’n Weiderost – wann’st driwa bist is zwor ois neich –
und loss da nit eired’n, das ma des nit tuat!
A wenk aufpassen, schnoi driwageh – dann geht des guat!

Denk dru – Du muasst es wogn!
Ob’s schneidig gnuag bist, des muasst soiwa sogn!
i ku da nit vasprechen, dass enttan Zau besser tuat –
owa ich woas, boids di traus’d fühst die danoch guat!