Die Dachtrupf weascht bei mir in an Fassl gfong,
damit ma zun Blumengiassn a Wossa daglong,
des Fassl soid oiwei  voi Wossa sei,
wei’s siest nimma dicht ist – des is donn nit fei!

Hus iwasechn – hu mit’n Schlauch nochisg’schitt,
is owa bei die Fassldaubn aussagrunna in da Mitt,
da brauchst Geduid: Schitten, nocha boaten,
eascht nocha kust wieder a wenk Wossa nochiloatn!

S’Hoiz muas des Wossa aufnemma und vadauen,
damit sie die Klossen schliassen, da kust nocha zuaschaun,
bein Dechtln kust nit hudeln – des braucht sei Zeit,
boid’st des vastonden host, donn lafft des gscheit.

Die Kinda soidn im Muttaleib schon Mozart hean,
im Kindagoschtn Chinesisch leana, des hädn’s gean,
Balletstund, Flöten-, Klavier- oda Gitarrenspühn,
Turnierreiten, Boldern – oft a gegan Wühn!

Kriang nit Zeit zun Trama, an Bachei zuaschaun,
oda si amoi auf an Bam aufikraxln traun,
mit an Staudomm s’Wassal fossen,
oda oafach amoi a Steckal schwimma lossen.

Bein Spühn amoi a dreckig wean,
Moosbeen an Mund eichibrocken – des tatn’s gean,
oda oafach amoi in d’Luft schauen, wo’s d’Vegl tand,
mia woind dass die Kloan scho so fria dawoxen sand!

Is owa wia bei mein Oachnfassl – is gonz gleich!
Eigentlich ist des ja ois nit neich!
Mia soin die Klossen nit mit Silikon zuaschmian,
mia soidn’s dechtln, sie soidn s’Wassal eichirinna g’spian!