Wia i bei da Haustiar eichigeh
und vou Dir im Hausgang steh,
do schauggst ma in d’Augn – do woas i gwies:
Dass rundumadum ois nit so wichtig is!

Vo da Schui kimmb’s Dianei – schaugg mi u
sie stroiht, wia’s hoit nur a Dianei ku,
vazöht von Tog – do woas i gwies:
Dass genau des fia mi so wichtig is!

Nocha sitz i mi auf d’Terassen – es is so fei,
so derfat’s im Winter eigentlich gor nit sei,
lies a poor Seiten von da Zeidung – d’Augn foin zua,
da Stress foid o – i kimm zur Rua.

I füh mi woi – s’gonze Leben stimmb!
Mecht des Gfüh toin – mecht dass mi wer bsuachen kimmb!
Mi tunkt’s so fein, i gspia, dass eigentlich nix Bessas geit –
I moa, heit bsuach i mi soiwa – i moa des war gonz gscheit.