Die Kirch is voi – die Orgl spüht
oi send schee uzogn – was für a Büd!
Es is hoit oiwei wieda a groasse Freid,
boid’s fia so a kloans Butzerl a Taff ogeit.

Bei da Oma sicht ma die Zachei rinna,
sie hot oiwei wieda a mords Gaudi mit di Kinna.
Is scho schee, boid Zuawachs kimmb
und a da Familie rundum ois stimmb.

An Opa tuat des Kreiz schon weh
es is ja woitan long zun Steh.
Da Pfarrer tuat d’Mess nit krod ochaleiern
er mecht die Taff auf lateinisch feiern.

S’Baby is im Taffkleid – so is Tradition
is auf’n Orm von Ged – der steht gonz voun.
Es schloft ganz friedlich – es scheint’s z’vasteh
da Ged is schmattig – da ku’s ma nur gut geh!!

Die Mama schaut auf’s Kindl mild
da Papa leg die Hand um d’Mama – a scheens Bild!
Valiab schaung sie de zwoa oiwa wieda in die Augn
kurzum ois is Harmonie – da brauxt nur in die Runde schaugn.

Da kloa Wasti schaugg si des guat u
jetz hommb’s bei sein koan Schwesterl s’Haiwei ochatu
d’Ministranten hoifn an Pfarra a poor Hafal hebn
er gwoscht’z – jetz weascht’z glei spannend – glei weascht’s was Gebn!

Und Tatsach – die Leit in die Bänk stehnd jetz oi auf
da Orglspüa leg no a Halleluia drauf
s’kloa Köpfei legg a auf d’Seit – er schaugg genau
da Wasti is zwor kloan – owa gonz extrig schlau!

Da Pfarrar sing eppas in Latein
jetz hoda s’Gfüh – er muas si gschlein
er zupft a Pfarra – wü vo da Mama d’Mahnung weidagebn:
„Muast zeascht die Hantti waschen, eascht nocha derfst s’Baby hebn!“