Host Sorgen und kust es gornit fassen –
die hot die groasse Liab verlassen!
Host da nia denkt, dass so wos geit
Dir is, ois wann da die hoiwe Seitn feit.

Zeascht Tränen – es kimmb die Wuat dazua
dass’d verlossn weascht, losst Dir koa Rua.
Host – aus Deiner Sicht – ois richtig gmocht,
über d’zeitengweisen Vorwürf host nur glocht.

Die Kinder kennand sie nimmer aus,
Ufried und Rean erfühd des Haus.
Um’s Goid geht’s und wer nimmb wo was mit,
koana mecht nochgem – is nua mehr Gstriet.

Moast, boidst gnuag trinkst, oft geht s’da besser
is owa nua kuschz – danoch is Leid’n no gresser!
Rundum Di sechn’s oi – so geht’s nit weida –
soim siggst des nit – moast Du bis vü gscheida.

Vertrau ma – schau her, do is mei Hand
i kua da zwor nit hoifn, owa red ma mitanand!
Loss saufen sei, es weascht nur schlimma
des blede is, die Sorgen kinnand schwimma!