Bis Ende 2040 soid ma klimaneutral sei!
Jetz is endlich fix – i moa des is fei,
die Natur weascht an oanlan Schnaufa toa,
fie insare Nochkommen guad, wia i hoid moa!

Auf’n Wossastoff liegt die Hoffnung der Industrie,
kemmand owa nicht recht weida, kimmb mia fie!
eFuels ist des neiche Zauberwort fie’d Mobilität,
„ist noch in den Kinderschuhen“ des is hoid bled!

Fie ois gibb’s Konferenzen auf da gonzen Woid,
Lobbyisten, Gauner, dia schaug’n auf’s Goid,
owa vielleicht geling’s decht, es waa zun Hoffen,
der noie Weg fie oi Beteiligten is no gonz offen!

I tat die Aufmerksamkeit no auf oan Aspekt lenken:
Glab, dass ma dem zwenk Prioritäten schenken!
Wia soid da Toifi in Zukunft sei Höö betreibn,
wenn Gas, Öl und Koihn zun Hoazen fein?

Soid’s da Toifi mit Wärmepumpen probian?
Oda tonnenweis Pellets in die Höö oichifian?
Mit Wossastoff die Sünda siadn und broden,
oda schmeisst er mit eFuels donn den Loden?

Mei Voschlag waa, dass die Mander im Vatikan wos tand,
wei dia jo des Vertriebsteam vom Himmidati sand,
do wuscht da Petrus sicher gonz bled schaun,
do miassat’ns an Grenzzaum um an Himmi ummabaun!

Die Zeit dräng, 20 Johr, des send glei vie!
Des Fegefeia ois Übergangslösung haut nid hi,
koa vichi, koa zrugg, die Flüchtlingsberatung feit,
wei’s hoid a koane Rückführmöglichkeitn geit!

Des Thema mit da Höö soid ma nid aus die Augn verlian!
Die nexten 20 Johr kemmand oi dru, die jetz regian,
da Toifi soid mit’n Foia untam Osch nid spoon miassn,
waa wichtig, dass fi immer und ewig fie die Sünden biassn!