Gonz frira hot da Oiminga an Jodler vom Joch ochapleat
damit eam sei Diandl auf da onan Toiseiten heat.
Spater ummi homma mit’n Handy g’schaut,
dass – boid’s dringend won is – mit da Liab hihaut.

Bein Sportln zoagn wia storch mia sand,
an Testosteronspiagl auffidrahn, boid ma ebbas tand,
im Gsicht a wenk rot u’laffen, in die Augen schaugn,
Handei hebn, a Bussl oder mehr – des tat ins oi taugn!

Jetz geht ois iwas Facebook – da weascht geposted
und d‘Foto vo jeda Rauschmett’n gehosted.
Er schreib seine Freind, wia vüh Diandl das a schafft,
sie schaugg, dass si ihre Reize im Intanet vakafft.

Des Facebook is jetz an die Börse gonga,
es hot owa nit gonz so guat u’fonga!
I moa, dass oafach a neiche G’schäftsidee feit,
wei schon fast oi drinn sand, a koane neichen User geit!

Mia miassat’n die Viecha im Stoi dazua bringa
und ois neiche Benutzer ins Intanet zwinga!
Nocha kunnt die Kua posten boid‘s amoi stiascht,
oda da Fokk oder die Goas die Liebe g’spiascht!

Da Bauer miassat nit long ummaboaten,
die Viecha kunnten ihr Liebesleben genaua loaten!
Da Tierarzt war im Facebook online – Tog und Nocht!
I stöh ma vieh, dass do a jeda a guat’s G‘schäft mocht!

Nur mit’n „i like it“ tand sie die Viecha schwar,
is ja nit so lustig, wia’s bei ins Menschen war!
Es miassat sie da Viechdokta zun Computer hucken
und hoit vie Kua und Fock den Like-it-Button drucken.

I bi gonz euphorisch – i moa die Idee, die is so guat,
dass sie die gonze Woit vaändert tuat!
Vielleicht soid i decht schnoi zu da Raika laffen
und mia a poor Facebook-Aktien kaffen?