Zur Hochzeit kheascht’z dass ma a Ansproch hoit –
i  hoff, dass enk die meinige jetz gfoid!
I mecht des Glasl mit da Kuapfloar und des Sacki Hei herstöhn
und enk dazu mei kloane Gschicht vazöhn:

Noch an Winter fong des Gros zun Wachsen u,
gonz zort, schee grea, mit Bleami, die i so gern hu,
doscht und da a Foiss – da kimmbst nit aus,
damit s’Gros aufkimmb, stichs liawa draus.

Um Pfingsten umma, möd da Radio a poor scheene Tog,
nocha weaschz zun Egaschtn – des is koa Frog.
Boid’s Hei so frisch is – es riacht so guat,
tat ma an Liebsten drinn schloffen – a boids a wenk stechen tuat.

Die gonze Nocht schmeckst es – es is so guad,
es is so fein, boid aso guad riachn tuad!
Des sand die gschenkten Tog
an die ma ins gern erinnert, de wos ma so gern mog.

Aufs laare Foid kimmb nocha da Mist.
Do was guad,  wonn’st Fensterzumachen nit vagisst!
Das stinkt’s an Tog – des bleib nit aus,
sogor die Wesch stinkt danoch – es ziacht durchs gonze Haus.

I winsch enk, dass d’mehrawei noch Hei schmeckt
und dass si die Gschicht vo mein Bauernjohr mit   enkriga deckt,
boids amoi zun Gillen is, mochts oafach die Fensta zua,
an nexten Tog is ois vorbei, donn is wida a Rua!

Boid doscht und da a poor Foissen aufrecken –
stecht’s se’s mitnannd aus, lasst‘s enk nicht schrecken!
Wonn‘s anstrengend weascht, boids nit so guad lafft im Leb‘n
zommhoit’n, geht’s es u mitanand – net nit aufgeb’n!

Boid da Summ durch d’Luft fliag – tat’s enk nit long streibn,
war schod, wonn zwoa so wea es aloa bleibn –
tat’s nit z’long boaten – siest weascht s’Mesei z‘trucken,
es is nit nett, an Oita aloa da z‘hucken.  

Boids mittnand oid weascht’z – boid‘s enk‘s da Herrgot vagunnt,
soid’s zruckdenken an a schee‘s Leben und jede Stund,
in denen enka Weg durch’s Egaschthei gfiad hot,
s‘ Ohoisn nia vagessen – d’Liab nit zoang war schod.

An Orient hät’s heit a poor Kamoi obgebn –
nit siachisch sein – owa decht s’Goid zommhebn,
dem Onan seine Winsch vo die Aug’n olesen,
siest is des gonze Goidvadean vie gornix gwesen!

I häd no an Haufen Winsch, die i enk mitgebn mecht
Boid i enk so uschau, kimmb ma vie, des weascht scho krecht.
Legg’s die Händ innanond – boid’s enk gspiat’s is fei:
I winsch enk oafoch – so wia jetz soid s’gonze Leben sei.