Die Resi is fria Witwe woon,
sie hot gonz frria ihren Mann valoon.
Nix is wia zeascht – ois is so laar
sie winschat sie, dass a no umma waar.

Zun Joggassn woits wieda amoi unta d’Leit,
hofft, dass a wenk a Ablenkung geit,
richts d’Diandlgwandl viecha, geht zum Frisär,
sie mocht sie fesch und richt si her.

Bein Hendlessen stroiht’s oana u,
frogg, ob a si a wenk dazuahucken ku,
a Kompliment, a Glasei Wei,
da Resi tunkt die Aufmerksamkeit fei!

Amoi koane Sorgen, es geht nur um sie
und er ruckt oiwei weida hi,
gonz zärtlich glong a noch da Hand,
so gengan‘s spada aussi hoam mitnand.

A scheena Abend – sie wüh nit denken,
sie mecht eam und ihr soim die Nacht heit schenken!
Die Geborgenheit – des is so fei,
so schlafft’s in seinen Armen ei.

Des schlechte Gwissen kimmb in da Fria,
wor des schon richtig – der Mann bei ia?
„Des Trauerjohr is nit vagonga – i moa des wor dumm,
mei Monn draht si sicher an Grob in um!“

Jetz woas, wos ihr so gfoin hot – es sand seine Augn!
Die stroihn so und wo die Toifei aussaschaugn!
„Kimm her, loss die no amoi liabn, des war jetzt wichtig!
Nocha draht a sie no amoi um und liegg nocha wieder richtig!