Jugendwahn
Die Lisi schaugg in Spiagl, sie weascht gonz bloach,
siecht, da Muskel bein Owaorm der is gonz woach!
Sie woas, dass ma des den „Bingo-Ärmi“ nennt,
wei ma des vom Aufzoagn bei die Bingospiela kennt!
Jo, woos is denn des do zwischen die zwoa Augn!
A so a Foitn! Jetz reichts ma, jetz muas i schaugn,
a poor Botox-Spritzen in‘s Gsicht, de miassen her,
i bi decht koa a oide Schochtl, so geht‘s nid mehr!
Die Freindinna send im Instagram vatredn,
zoagn Fotos vo ea her, ois wia die Bledn,
d’Lisi moand, den Busen z‘liften tat dazua fian,
dass’a a wieda schee hersteht, des muass prowian!
„Herr Dokta, woos hu i nid schon ois vasuacht!
Dinner Cancelling, Anti-Aging ois hu i s‘buacht,
bi ummandum operiascht, hu vom Osch des Fett
direkt in die Lippen kriag – des woor nid nett!
Schmia mi mit Bienenwox und Olivenöl fest ein,
Pro-Präbiotika einnehma soid hilfreich sei,
i bi decht no vüh z’jung zum Oit sei wia i moa!
Herr Dokta, hoif’ns ma, mia miassn do woos toa!
I mog nid oid sei, wüh in oana onan Liga spühn!
I mecht mi no amoi a so jung ois wia a Baby fühn!“
Da Dokta suacht in da Schublod, woas koan Rot,
bis er ihr oafoch an Schnuller in Mund eichisteckt hod!
Zusammenfassung
466 Jugendwahn
Gedicht Monat Mai 2022
von einem überforderten Schönheitschirurgen
Bild Kurt Pikl Acryl 60 cm x 50 cm
Type: witzig
Beschreibungen und Ausdrücke
Die Lisi schaut in den Spiegel, sie wird ganz blass,
sieht, der Muskel beim Oberarm der ist ganz weich!
Sie weiß, dass man das den "Bingo-Ärmel" nennt,
weil man das vom Aufzeigen beim Bingo spielen kennt!
Ja, was ist denn das da zwischen den beiden Augen!
Eine solche Falte! Jetzt reicht es mir, jetzt muss ich schauen,
ein paar Botox-Spritzen ins Gesicht, die müssen her,
ich bin doch keine alte Schachtel, so geht das nicht mehr!
Die Freundinnen sind auf Instagram vertreten,
zeigen Foto von ihnen her, als wie die Blöden,
die Lisi meint, den Busen zu liften würde dazu führen,
dass er wieder in Form kommt, das muss sie probieren!
"Herr Doktor, was habe ich nicht schon alles versucht!
Dinner Cancelling, Anti-Aging, alles habe ich gebucht,
bin rundherum operiert, habe vom Hintern das Fett
direkt in die Lippen bekommen - das war nicht nett!
Schmiere mich mit Bienenwachs und Olivenöl fest ein,
Pro-Präbiotika einzunehmen soll hilfreich sein,
ich bin doch noch viel zu jung zum Alt sein wie ich glaube!
Herr Doktor, helfen sie mir, wir müssen da was machen!
Ich mag nicht alt sein, will in einer anderen Liga spielen!
Ich möchte mich noch einmal so jung wie ein Baby fühlen!"
Der Doktor sucht in der Schublade, weiß keinen Rat,
bis er ihr einfach einen Schnuller in den Mund hineingesteckt hat!