Krippenspiel

Ochs_Esel

I-A, mei zipft mi des u,
das i heia scho wieder in der Kripp’n steh ku
oi hoiwe Stund des Krippeig’spüh,
i ku’s nimma hearn, mir is des z’vüh!“

Muh! warum schauggst so fad?
Ois wia wonn d’Woid glei untageh tad?
Is ja nit so schlimm, reiß di a wenk zomm,
passt ja, solang ma wos zun Fressen homm!“

„I-A Du Ochs du, schau die oamoi um!
Des gonze Theater is mia oafoch z’dumm!
I mecht do weck – du muast mi untastützen,
do voun send dia vom Tierschutz, des mias ma nützen!“

„I mecht gern ins Gut Aidabichl, des is gwies,
beim Michi Aufhauser des wa‘s Paradies!
Des wa’s, den sehnlichen Wunsch den hun i,
das mi hintan Oawaschl kraulat da Georg Clooney!“

„Merchen bring de von die Seitenblicke,
die blonde Operettensängerin die Dicke.
A schee’s Foto mit’n Mister Wunderbaar,
i stöh ma vie, dass des da Himmi waar!“

„Jetzt los des Schwanzei hänga, die Augn rinna,
die Oawaschl knickt, damit’s oi sechen kinna,
dass mia da leiden miassn, die Rettung naht!
Damit ins die Aktivistin mitnemma tad!“

„A Foam voun Maul, schau a wenk g’schreckt,
do schau – i moa jetz homm’s ins glatt entdeckt!
Halleluja, Gloria in excelsis deo, Amen!
Jetz vahandelt da Josef mit die Damen!“

„Hoia weascht Weihnachten so richtig schee!
Mia kinnand zun Niedalegn ins worme Heibett geh!“
I winsch da, dass dir s’Christkindl a schee tuat:
Frohe Weihnachten,gsund bleibn, dann is ois guat.

Zusammenfassung

217 Krippenspiel
Weihnachten 2012

die Weihnachtsgeschichte 2012, die ich den Freunden von "Hoangascht" schenken will

Type: Weihnachten, witzig

Beschreibungen und Ausdrücke

zipft mi des u = geht mir auf die Nerven
heia = heuer
oi hoiwe Stund = alle 1/2 Stunde
Krippeig'spüh = Krippenspiel
do voun = da vorne
den hun i = den habe ich
hintan = hinter dem
Oawaschl = Ohr
kraulat = kraulen würde
Merchen = Karotten
rinna = rinnen
oi sechen kinna = alle sehen können
mitnemma tad = mitnehmen würde
Foam = Schaum
voun = vor dem
homm's = haben sie uns
hoia = heuer
weascht = wird
kinnand = können
Niedalegn = Hinlegen
a schee tuat = auch Gutes tut, freundlich ist