Mischwoid
Danaxt is ma im Internet a Video untakemma,
wo zwoa riesige Gorilla-Ötan ihre Baby hernemma,
zuachadrucken, streichin oda oafoch nua hebm,
ma siecht, dass si die kloan Affei Geborgenheit gebm.
Do kemmand ma sofort meine kloan Mannei in Sinn!
Se send jetz 7e, 5e und 4 Monat, mid de i so glücklich bin,
wohnand jo nid weit weck, sechens fost oi Tog,
Oma und Opa send Teil vo ean Leben, woos i gonz gean mog!
A moi a Biachi vielesen oder Schwoschza Peter spühn,
oda oafoch nua kinnisch sei, do kust’z Vatrauen fühn,
da Opa moand’s guad, a boid a adiam an Bledsinn mocht
und noch’n easchtn Erstaunen donn decht ois locht!
Boid adiam woos schwaar ausschaut, föhd oft da Muat!
Do tuat nocha die Erfohrung und die Hüf von Opa guad,
an Orm ummalegn, du-schoffst-des-scho kommunizian,
des ku zu an stoizn und stroihad’n Mannei fian!
Boids vou dia stehn’d und dia die Woit erklaen,
ku i oft hoifen, boid’s aus’n Internet vüh Bledsinn hean,
mid ea reden, woos wirklich wichtig is im Leben,
oiwei fie se do sei und ea vüh Sicherheit geben.
Mid ea an Woid aussigeh, nachend beim Wossafoi steh,
dass eana Hoamat schätzen, bei ins is so schee!
Loss ma‘s ois Zirben woxen, es muass nid ois keschzenkrod sei,
bei de vühen Feichten des heit geit, is a wenk Mischwoid fei!
Boid si si – oafoch so – zu dia her hucken,
sie nocha – wia dia kloan Affei – zuachadrucken,
dein Finga nemmand, bleib d‘Zeit auf oamoi steh,
nocha woast dass’d es richtig gmocht host, ma, is des schee!
Des is des oanzige woos zöht auf dera Wöd,
s’Glick mid da Familie is mehr weascht wia’s Göd,
ois Opa kust des genießen, do host donn die Zeit,
hoffat jo inständig, dass des ois no gonz long geit!
Zusammenfassung
563 Mischwoid
Gedicht Monat August 2026
ein Liebesgedicht für meine Enkel
Bild Acryl 50 cm x 40 cm
Type: Liebesgedicht
Beschreibungen und Ausdrücke
Neulich ist mir im Internet ein Video zugespielt worden,
wo zwei riesige Gorilla-Eltern ihre Baby hernehmen,
in den Arm nehmen, streicheln oder einfach nur halten,
man sieht, dass sie den kleinen Äffchen Geborgenheit geben.
Da kommen mir sofort meine kleinen Enkel in den Sinn!
Sie sind jetzt 7 Jahre, 5 Jahre und 4 Monate, mit denen ich so glücklich bin,
wohnen ja nicht weit weg, sehen sie fast jeden Tag,
Oma und Opa sind Teil von ihrem Leben, was ich ganz gerne mag!
Einmal ein Büchlein lesen oder Schwarzer Peter spielen,
oder einfach nur kindisch sein, da kannst du das Vertrauen fühlen,
der Opa meint es gut, auch wenn er manchmal Blödsinn macht
und nach dem ersten Erstaunen dann doch alle lachen!
Wenn manchmal etwas schwer ausschaut, fehlt oft der Mut!
Da tut dann die Erfahrung und die Hilfe vom Opa gut,
den Arm herumlegen, "du-schaffst-das-schon" kommunizieren,
das kann zu einem stolzen und strahlenden Enkel führen!
Wenn sie vor dir stehen und dir die Welt erklären,
kann ich oft helfen, wenn sie aus dem Internet viel Blödsinn hören,
mit ihnen reden, was wirklich wichtig ist im Leben,
immer für sie da sein und ihnen viel Sicherheit geben.
Mit ihnen in den Wald hinausgehen, nahe beim Wasserfall stehen,
dass sie ihre Heimat schätzen, bei uns ist es so schön!
Lassen wir sie als Zirben wachsen, es muss nicht alles kerzengerade sein,
bei den viele Fichten die es heute gibt, ist ein wenig Mischwald fein!
Wenn sie sich - einfach so - zu dir her setzen,
sie dann - wie die kleinen Äffchen - herdrücken,
deinen Finger nehmen, bleibt die Zeit auf einmal stehen,
dann weißt du, dass du es richtig gemacht hast, das ist schön!
Das ist das einzige was zählt auf dieser Welt,
das Glück mit der Familie ist mehr wert wie das Geld,
als Opa kannst du das genießen, da hast du dann die Zeit,
ich hoffe ja inständig, dass es das alles noch ganz lang gibt!