Auweh, jetz homma’s schwarzweiß vo da OECD:
Insre Schuira send wieder schlechta won – mei tuat des weh!
Bein Rechna, bei die Naturwissenschaften und vo oim bein Lesen
is des Ergebnis a Fiasko gwesen!

Da Lehrer ku des Ergebnis oafach nit glabn – er mecht’s jetz wissen –
er hot des Gfüh, de hommb in’s b’schissen!
Er hoit sie an Franzei – er is nit guad owa a nit schlecht,
hoit Durchschnitt – fie des Experiment krod krecht!

„Franzei – wo’s passiert bei Null Grad?“
Da Franzei druckt ummadum, woas nit wos a tat!
„Geh Franzei – des is decht nit schwar!
Do gfriaschd’s Wasser – des is woi klar!“

„Prowia ma o amoi – 100 Grad – des war mei Frog!
Denk nach, los guad auf wos i da sog!“
Dem Franzei is eh z’bled – sei Heaschzei pocht –
„Des is decht gonz oafach – des Wassa kocht!“

Da Lehrer in seina Verweiflung weascht gonz bloach,
an Franzei seine Knia send a gonz woach:
„Oamoi prowia mas no – mechts no oamoi wogen:
Franzei – wos passiascht bei 90 Grad – kust ma des vielleicht sogn?”

Durch’n Franzei geht a Ruck –
des gonze Sebstvertrauen is auf oamoi zruck!
Ma sicht direkt, wia di kloan Eigei lochen:
„Da weascht des Wasser wahrscheinlich an rechten Winki mochen!“