I woas nit, ob Du auf Wellness stehst
und adiam amoi in die Sauna gehst.
Do soid ma nit z’long drinn sei, wei do is hoas,
drum gibbs a Sanduhr, dass ma die Minuten woas.

Danaxt hot si in der Sonduhr a Kernei vaklemmt
und hot damit den Durchfluss g’hemmt.
Bis ona mit’n Finga zuachiklopft,
nocha is da Sond wieda durchitropft.

Boid i bei ins auf die Berg obn steh,
oda oafach a wenk spaziangeh,
gibbs Momente, wo i demiatig oafach die Luft u’hoit,
wei ma insa Hoamat a so guad g’foit!

An Schworzsee ausst, mit‘n Koasa und an Houn
huck i in an Schiffi, gonz gedonkenvaloun,
an Wüdseeloda schau i aufn See ocha von da Henn
is woi oana vo die scheensten Fleck der Woid, wos i kenn!

An Sintasboch, wo‘s Wassa ochaspritzt,
do is gonz gleich, boid ma bein Auffigeh a wenk schwitzt,
Maikisteig, Ackerlspitz und Griesbachklomm
ku gornit oi aufzöhn, wei mir so vüh scheene Platzln homm!

Da huck i nocha und denk ma: „Jetz wa‘s schee!
Liebe Sanduhr bleib jetz oafach a wenk steh!
I vasprich da, i kimm noch an Boisei zuachiklopfen,
nocha kust vo mir aus wieda weidatropfen.