Wos so an Fernsehn adiam zoagn is scho laut!
Do wutzeln sie sie im Bett umadum und zoagn vü Haut,
so a Programm hat s’Lisei gsegn –
es is scho long noch Mittanach gwen.

Zeascht war ihr viekemma, da schoit i glei um,
des is nix fie mi – des is ma z’dumm!
Da Loda, der foscht mit ana Feder iwa d’Haut,
da Nackat’n scheints z’gfoin – des sicht ma glei, wie’s z’frieden schaut!

“Franzei – wia wa’s, wonn mia zwoa amoi wos prowian?
I mecht a so was Fei’s wia in Fernsehn gspian –
kimm – kitzle mi a mit oana Feder auf d’Nocht im Bett,
des war amoi wos onas – i moa des war nett!”

Nochn Stoi geh mocht sie s’Lisei fei.
Tuat a Perfum auffi, schmiert sie mit oana fein Creme ein,
auf d’Nachtpfoad kus heit leicht verzichten!
Tuat si an Bett in an Poista und die Tuchant richten.

Da Franzei schiab an Waschtog ein,
a er mocht sie a fie’s Bettgeh gonz extrig fei!
Sogar rasiert weascht und die Zähnd weand putzt,
D’Haxen wean 2x gschwaschen – er hofft dass des was nutzt!

So lieg s’Lisei auf’n Bauch und boat voi Ungeduid.
Ihr kimm’s ewig vie – do is owa gwies die Aufregung schuid!
Da heaschz, wia da Franzei iwa die Stiagn auffakimmb,
er geht so komisch, ihr kimmb vie, das do wos nit stimmb!

Die Tir geht auf – jetz geht’s glei los!
Sie kriag scho roade Flecken – die Aufregung is so gros!
Do gspieschzes – a Feder streicht ganz sanft hi und her –
sie geht gonz in ihr Gfüh auf – merkt rundumadum nix mehr!

Da heascht’z auf oamoi eppas Komisch’s – kus nit erklean!
Sie draht si um und ku si von lauten Lachen nit dawean!
“Franzei – du hätt’s krod a Feder mitnemma soin
und nit insan gonzn Goggl von Stoi eichahoin!”