I lieg an mein Teich – wo’s i so gern tua
und schau rundum die Viecherl zua.
Die Wassaläufer, die wia Jesus auf’n Wossa gehnd
und die Libellen, die sogor in da Luft in Liab verbunden send.

Gonz extrig hommb ma’s d’Schmetterling utu
von denen i hoia gonz damisch vü hu!
Auf die Königskeschzn, die Echinazea und auf’n Sommaflieda,
lossn sie die scheen Viechal nieder.

Wohrscheinlich bi i biologisch nit gonz richtig –
owa i hu so’s Gfüh, eigentlich send d’Schmetterling nit wichtig!
Flattern luftig und leicht vo Blia zu Blia
so richtig orweiten sixt des nia!

Derfst er nit znachnd kemma – derfst net a wenk schaugn,
wei s’Ugreifen tuat dem elfengleichen Gschöpf nit taugn!
Dafi posiert er mit d’Muster und Forbm – die gonze Procht
boid er si hi- und herdraht und d’Fliegeln aufmocht.

Is eigentlich sinnlos – tuat nit beissen, stechen oder jucken
net a wenk Nektar trinken und a wenk ummahucken.
Vo dem Goibn, der vou mir gauckelt, hu den Nam nit kennt
drum hu i’n oafach „Paris Hilton“ gnennt!