Danaxt hu i was Furchtbar’s glesen,
es is in an Interview mit an gonz an Gscheiden gwesen:
Die Woid gib’s nur mehr sechs Milliarden Johr!
Donn is ois futsch – donn is ois gor!

Die Erd weascht zu ein “Weißen Zwerg”,
der donn vaschling insre Seen und insre Berg!
Zeascht hoit a si Kraft vom roten Riesen,
nocha zreist’s ins und weck sand insre Wiesen!

Seitdem ku i nimma schloffen!
Wia soin’d des insre Enkei schoffen!
Schon in oanahoib Milliarden Johr ku koana mehr bei ins Leben –
ja scho in 500 Milliona Jahr san ma oi hi, des muaß ma si amoi geben!

Es kunnt owa a sein, dass 2036 der Planet Apophis kimmb,
die Chance steht 1:45.000 boid des ois stimmb!
Boid der ins trifft, stöh dir des amoi vie!
Donn mogst gonz gach ausstöhn, siest bist hie!

Ja – boid die Zukunft so grausig eichaschaut
und ins des Schicksoi links und rechts Oane eichihaut,
muas i ma jetz amoi a Schnapsei eischenken,
des hüft ma sicher, iwa an Ausweg nochz’denken!

Do brauchst die nimma ärgern, wia’s mit da Politik steht!
Dass weitum in da Koalition nix weidageht!
Do is völlig wurscht, dass auf da Bank weit feit –
jo im Gegenteil, do muaßt no Goid o’hem solangs oas geit!

Auf den Schluss auffi war no a Schnapsei guat,
wei der mi zu oana glaskloren Strategie hieloaten tuat!
Des Onehma nach die Weihnachtskeks ku i mir jetz schenken,
i muas nur gonz fest an die Weissen Zwerge denken!

Auf des auffi geht no a Schnapsei – ma muas sie ja bewusst entscheiden!
I daspor ma des Koiaauframa, Rasenmahn und’s Heckenschneidn!
No a Schnapsei und mia weascht schee longsam klor,
dass die Nochricht a da Zeidung gornit sooo schlecht wor!

De poor Jahrl, de mia no hommb zun Lebn,
bis ma vabrennand, von Planeten troffen wean, oder  wos siest weascht gebn,
es kunnt ja sein, dass d’Wissenschaftler wieda amoi an Bledsinn redn:
Boids die Geschichte so vafoigst – s’war ja nit  s’easchte Moi gwen!