Wossapistoin
Es is nid zum Glab’n, wia schnoi die Zeit vageht
und jetz fie insa kloas Mannei scho die Taff u’steht!
I geh gean zu da Taff zum Donkschee z‘Sogen,
boid ma insan Sonnenschein in die Kirch eichitrogen.
Wennst mid dein kloan Grinsal die Soi auftuast,
oda mid deiner Energie gonz fest zowin muast,
donn hoff i, dass’d mei unendliche Liebe füh’st,
i tua krod die Boata, dass’d mi umorma wüh’st!
Herrgott im Himmi, boid’s die wirklich geit,
pass auf insa Mannei auf, des waa gonz gscheit,
hoif ins, dass ma’n oi mitnond begleiten
und so sei Leben in a scheene Zukunft leiten.
Is so schee, dass ich teilhoben derf a dein Leben!
Mei Wunsch waa, dia no gonz vüh Bussln z’geben,
dass i den G’ruch vo dia no long in da Nosen hu,
boidst bei mia bist und i do gonz fest o‘maggen ku.
Jetz wea ma amoi schauen, wos da Pforra tuat!
Boid’s Wossa nid z’koid is, des passat guat,
vorsichtig soid a sei, boid a mei Mannei tafft,
damit eam jo nid des Wossa iwa’s G’sicht ocha lafft!
Und wehe, wenn sie da Herr Pforra nid zommreissen soid!
Donn vaspricht da da Opa, dass a di von da KITA o‘hoid,
nocha gemma mitnond in die Kirchen mit da Spritzpistoin
und weand den Herrn Pforra aus’n Beichtstuhi aussahoihn!
Zusammenfassung
455 Wossapistoin
Gedicht Dezember 2021
zur Taufe meines Enkerls
Type: Liebesgedicht, Lustig
Beschreibungen und Ausdrücke
Es ist nicht zum Glauben, wie schnell die Zeit vergeht
und jetzt für unseren kleinen Buben die Taufe ansteht!
Ich gehe gerne zu Taufe zum Dankeschön sagen,
wenn wir unseren kleinen Sonnenschein in die Kirche hineintragen.
Wenn du mit deinem kleinen Grinser die Seele aufmachst,
oder mit deiner Energie ganz fest zappeln musst,
dann hoffe ich, dass du meine unendliche Liebe fühlst,
ich warte sehnsüchtig darauf, dass du mich umarmen willst!
Herrgott im Himmel, wenn es dich wirklich gibt,
pass auf unseren kleinen Buben auf, das wäre gescheit,
hilf uns, dass wir in alle miteinander begleiten
und so sein Leben in eine schöne Zukunft leiten.
Ist so schön, dass ich teilhaben darf an deinem Leben!
Mein Wunsch wäre, die noch ganz viele Küsse zu geben,
dass ich den Geruch von dir noch lange in der Nase habe,
wenn du bei mir bist und ich dich ganz fest drücken kann.
Jetzt werden wir einmal schauen, was der Pfarrer macht!
Wenn das Wasser nicht zu kalt ist, das würde gut passen,
vorsichtig soll er sein, wenn er meinen Buben tauft,
damit ihm nicht das Wasser über das Gesicht hinunter läuft!
Und wehe, wenn sich der Herr Pfarrer nicht zusammenreißen sollte!
Dann verspricht dir dein Opa, dass er dich von der KITA abholt,
dann gehen wir zusammen in die Kirche mit der Spritzpistole
und werden den Herrn Pfarrer aus dem Beichtstuhl herausholen!