An Radio hu i danaxt a Diskussion kheascht,
dass’d Hormone varuckt spühn, wei’s jetz Frühling weaschd!
A Professor hot bei der Diskussion mit tu,
da Moderator hot gsag, dass ma zu dem Thema a uruafn ku!

Vo die Gegensätz, die sie uziang soin,
wei sie sie gegenseitig aus da Reserve hoin,
das des gonz guat war – oder decht a wieda nit,
da Oa sog scho, die Onare dazöht von ihren G’striet!

Dass besser war, boid’s stad dahin geht,
vo de gonzn gscheidn Sochen, wos in die Biacha in steht.
I muas sogn, so richtig schlauch bin i nit draus woan,
i moa, i tua oafoch so weiter, bi bisher guat gfoan!

Zun Schluss hot da Moderator den Professor gfrog,
wos er zu sein gonz wichtigen Problem no sog:
„Wie weiß man ob man zusammenpasst? –     wollt ich noch fragen,
Herr Professor können sie mir das zum Abschluss sagen?“

Nocha hu i amoi zeascht gmoand, i hu nicht richtig kheat!
Dawei’s auf’n Anruaf gwort hommb, hot die Musi blead,
i woit scho zun Hörer greifen, hu’s owa dann decht lassen,
es is so oafach, woit mi nit blamiern – es is ja nit zun Fassen!

Entweder de hommb oi den Biologieunterricht vaschloffen,
da war i boid bes woan, vo so vü Bledsinn, a soiche Offen!
Boid da Bua und s’Diandl d’Unterhos ausziachn und gscheit hinschaugn, is glei kloar
wo’s zommpassen – is ja gonz logisch, oandla woar!