MagstHaben
566 MAGSTHABEN
Gedicht Monat November 2026
das Liebesleben läuft heute ein wenig anders als noch vor ein paar Jahren
S’Dianei steht voun Papa, die Aug’n leichten,
sie mecht woos vazöhn, a wenk woos beichten,
ma siecht, dass um sei Aufmerksamkeit wirb,
dawei’s bei eam sitzt und a wenk ummaschmirb.
„Papa, i bin gonz valiab in Paul“, so fong’s donn u,
„Den i auf Instagramm im Internet kennag’lean hu,
nocha homma iwa Facebook Freindschoft g’schlossen,
mia send vor Rührung die Tränen in die Aug’n g’schossen!
Nocha homma iwa WhatsApp an edla Tog diskutiascht,
des hod nocha zu einen offenen Liebeserklärung g’fiascht!
Iwa Skype hod a ma sei große Liebe zuakemma lossen,
des woor so schee, i ku des bis heit no nid gonz fossen!
Jetz woas is owa nid, woo’s soid i jetz mochen?
Durch’n Kopf gengand ma jetzt a so vüh Sochen!
Liawa Papa, kust ma du vielleicht an Tipp o‘geben?
Du host jo sicher vüh Erfahrung aus dein longa Leben!“
Da Papa denkt an Jungbauernball, des woor sein Zeit,
a wenk eichisumsen, ummaschmirrn woor g’scheit,
im Schworzsee nockat schwimma, des woor hoit nett,
die Dianei homm’s mit Mund-zu-Mund-Beatmung g’rett,
des neimoderne Internet-Gschwurbel is nid sein’s!
Boid’st do koan feine Haut g’woscht, des is nix fein’s!
„Jo Dianei, des klingt owa eh nid gor so schlecht!“
A g’scheide Ontwort geben, des waar hoit krecht!
„Nocha heirat’s hoid iwa TWITTER, des is nid schwaar!“
Moand, dass des da richtige Vorschlog waar!
„Die Kinda kennt’s donn iwa Amazon b’stöhn,
mid KI ku ma bestimma, wöcha G’schlecht dass wöhn’d,
des Baby bringand’s nocha im Schichtbetrieb mid DHL,
ohne groß Plog bei da Geburt, des geht ois gonz schnell!
Und boid’s nimma klopp, is des gonz oafoch wia i moa,
nocha kust dein Paul gonz oafoch bei „MagstHaben“ eichitoa!