Seltene Bergen

568 "Seltenen Bergen"
Gedicht Monat Dezember 2026

traurige und wütende Gedanken, wenn ich auf das Elend auf der ganzen Welt schauen muss

Bild Kurt Pikl Acryl 40 cm x 50 cm

 

Jo Mannei, warum schaugg’st denn so traurig drei?
Sand da die Tränen ausgonga, ku des scho sei?
Wo is die Mama? Is die Papa nimma umma?
Tand’s na nix in dei laar’s Schissei, leg da neamb an Orm umma?

Waa des dei Schui g’wen? Do hint wo die Bagger send,
wo die Leichen ummaliegn, ma koane Heisa mehr kennt?
Dia gonzen traurigen Miata und Kinda brechen mia’s Heaschz,
iwaroi nua Elend, Tränen, Hunga und gonz vüh Schmeaschz.

Owa dafie geits iwaroi die Raubritter, de si’s richten,
dahoam in die Paläste die Goidbarren aufschlichten,
mit Öl, Gas, Goid und onare Sochen guad vadean,
die Sklaven schuften lossen, dawei si oiwei reicha wean!

Frauen und Kinda buddeln in Lecha noch den „seltenen Ean“,
damit die U’Schoffa oiwei reicha und reicha wean,
mia kriang a den Hois vo dem gonzen Zoig nid voi
und find’n insan Lebensstandard auf eanare Kosten toi!

Wonn si bei die U‘Schoffa die Lebenerwartung u’gleichat
und dass – wia in der 3. Woid – fie vüh weniger Jahr’l reichat,
donn kriagat ma vielleicht wieder an Frieden auf insan Planet‘n,
boid ma dia Spinna sauber aufg’reiht in die Urnen hätt‘n!

I bin hoit froh, dass bei ins nix zun Hoien geit!
Dass deswegen vo die Raubritter a des Interesse feit!
Insa wundaschee’s Lond kinnands nid o’bauen,
sie kinnand nur auf insare „seltenen Bergen“ schauen!

Wia die Sun a da Friah aufgeht, die scheen Wassal rinnand
und – boid’s nid z’faui send – a vo an Gipfi ochaschaugn kinnand,
an Koasa kinnand’s nid eipocken und woonasch aufbauen,
do hüft des gonze Goid und Göd nid, kinnand a nua schauen!

Pass ma auf, dass des no long so schee bleib!
Drah ma insan Konsum z’rugg, der den schlechten Weg u‘treib,
damit insare Kinda nid a amoi dostehn’d mit laare Händ,
so wia ma des aus der gonzen Woid aus’n Fernsehn kennt!