wia geht's, wia steht's?
567 wia geht's - wia steht's
Gedicht Monat November 2026
Gedanken anlässlich meines (79) Geburtstages
ein Liebesgedicht an meine Familie
Bild Kurt Pikl Acryl 50 cm x 40 cm
Boidst a wenk in die Jah’l kimmst,
is guad, boidst‘d a adiam a Boisei nimmst,
schaust, wo’st steh’st, muasst ehrlich sei!
Nid ois woos do daherkimmb is oiwei fei!
Ideal waa’s Leben wia a Wäscheleine,
mit vüh Kluppen die hemb, des waa des feine,
da Wind waht fei, die Sunn scheint müh’d,
des waa fie mi des ideale Lebensbüd.
So woor’s fi mi nid oiwei, die Kluppen woo’n rar,
g’schitt hod’s wia wonn die Woid glei untagonga war,
da Wind hod doscht und do a Loch aussag’rissen,
zu deasen Zeit hod ma do owa nid long ummag’schissen!
Bualein, nid oiwei homm die Kluppen k’hebb!
Vüh dreckige Wäsch hu i am Boden dalebb!
Aufklaub’n, no amoi woschen und weida hoffen,
na, an Ufong is des mid da Leine nid guad g’loffen!
Auf oamoi hu i a Hüf kriag, do hu i’s g’spiascht,
jetz weascht ois onascht, dass’s jetz funktioniascht,
da Weichspüler fi’d Wäsch, koa Wind, koa Regen,
dazua no die Kluppal’n der Kinder, des woor a Segen!
Jetz a no die Kluppal’n vo die Enkei, de gonz fest heben!
D’Gsundheit passt a, jo, es is a wundaschee’s Leben,
so häng i auf da Lebensleine, die Sun is müd,
a fei’s Lüftei da Liab wahd um mi, is a schee’s Büd!
In dia Zeid’n, wo die Kaktus des Lebens ummag’stonden send,
hu ma jo decht recht oft an Stochi auf meine Weg eichig’rennt!
Liegen oi weit hinta mia, send vagessn und vorbei,
schweb auf meiner Leine weit driwa, füh mi frei!
Dia Gedonken kemmand ma, boid i auf’n Berg obn steh,
oda oafach mit dia amoi a Drimmi geh,
bei mia waht der Wind fei, die Sunn is fei,
jo, i bin meine vüh’n Kluppal’n donkbor, genau so soid’s sei!