Der Advent mocht insre Herzen weit,
des weascht a da Grund sei, dass zu der Zeit so fü Beddla geit.
A jeda mecht von „den weiten Herzen“ profitieren,
wos mir noch Weihnachten a da Goidtasch gspiern.

Jeden Tog is in da Post a Brief von an Verein,
de si iwa a kloane (owa a a groasse) Spende gfrein,
da Glühwein am Adventmorkt mocht a no s’Hirn gonz weit,
mit dem Effekt, dass da Hoam in da Goidtasch no weida feit.

Die Vareine plogn sie’s gonze Joahr –
send ois Idealisten – des is kloar!
Ohne sie war’s Dorfleben gor nit zun Denken,
drum is scho krecht, boid ma eah wos schenken.

Vie d’Rettung schickens gern die Kinder mit da Bix,
do is gonz soitn, dass ebba gib nix!
Vie d’Musi draht der Franz brav seine Runden,
er hot im Dorf scho seine fixen Kunden.

So kus schon passiern, dass a poormoi kemmand
und bei da Haustier doscht und da a poor Euro mitnemmand.
Dazu no die gonzen Briaf, des bein Schlitz eiwerfen,
a diam a moi geht da des schon ganz schee auf die Nerven.

Die Wawi is a Hantige – sie wohnt enta da Brugg,
boid sie an Goschtn geht, bringand d’Vegei d’Kerschn wieda zrugg!
„Da Fronz vo da Musi wor krod da – fie d’Foiawehr hu i hoia nix!“
Da Seppei steht bled da mit seiner Bix.

Bein Seppei blitzt’s kuschtz in die Augen auf –
er loßt si nix gfoin, drumm sog a drauf:
„Is scho krecht Wawi – i respektier Dein Wühn –
owa boids bei Dir amoi brinnt, donn soid a die Musi spühn!“