Page 17 - Hoangascht_2013

Die Zeit Soid i heit scho wieda die Kitzbühler lesen? Mia kimmt vie, des is eascht gestern g'wesen! Is scho wieda Donnerstag? Des ku decht nit sei! Wia die Zeit schnoi vageht, des is nit fei! Hu ma denkt, kunnst eigentlich die Zeit totschlogn So wia des manche Leit ois Lösung vorschlogn. Huck mi voun Fernseher, tua mi nit rian, vielleicht tat des zu a poor extrigen Jahrln fian! Die Zeit moand do nix, lafft oafoch weida, woas ma koan Rat, bi um nix gscheida, muas die Zeit guad nutzen, boids aso nit geht, die Zeit vaplempern des is bled! Die Augn offenhoitn, mia homms jo so guad! Aufs Gwissen losn, nix toa wos ma hoit nit tuat! Denen, die ma gern hod, zoagn das so is, donn is die Zeit guad g‘nutzt, des is amoi gwies! Mid‘n Goid nochjogn host Zeit vaschissen, owa des is nix Neichs, des weascht scho wissen, ma tuats trotzdem oiwei wieda, denkt nit dru, nutzt owa nix, wei ma nur mit oan Leffi essen ku! Ebban den’st gern host in die Augn schaun, oda oafach amoi d’Liab zualossen, mogst Di scho traun, do kust die Zeit an ehesten zun Stühstand bringa, und a poor Unendlichkeiten in Dein Leben gwinga. Ma miassat hoit den riesigen See finden kinna, wohi die gonzen Zeiten vo oi Leit hirinna! I wear amoi mid mein Kiwei a wenk schaugn, vielleicht find ihn, des tat ma schrecka taugn! 15