Page 41 - cover_2014_blanko1_kombiniertN

Hoamatkrax

Bein Huwabauern homms a poor Kia und Henna,
so dass mit'n Müchgoid recht guad leben kenna,
sie waan eigentlich gonz z'friedn mit'n Leben,
tat's krod an Buam ois Hoferben geben!

Hommb ois prowiascht, hädn jeden Rot u'gnumma,
sogor die Bergschuach hod a u'lossen, in sein Kumma,
an Eisprungkalender homms an Kühschrank uichipickt,
wias soweit gwen wa, hot'sn in die Kumma g'schickt.

A Dianei is won - Johanna is ihr Nomm,
mit der's donn eh a groaße Gaudi homm,
pfiffig, schneidig und vor oin
lasst sie sich vo Unfong u nix gfoin!

Mit Barbie-Spuin hot's nit vüh im Sinn,
huckt liawa voun in Traktor in,
boid da Metzga kimmt, hüfts bein Valohn,
sie ku a boid mit'n Heikran fohn.

Aus'n Dianei weascht a junge Frau,
krod aussa, wos wüh, woas gonz genau!
Ihr Mundwerk is weitum bekannt
d'Manda homms an scheichen oi midanand!

Da Sepp hod d'Johanna kennagleand,
es schaugg so aus, dass die zwoa a Paal weand,
ma merkt, wer do s'Kommando fiascht,
heit soggat ma, si is emanzipiascht!

"Sepp, Du tat'st decht so gean Bauer sei,
do war decht so a Hoamatkrax recht fei!"
Des Hoamatl tat i scho gean megn!
Ob i mit da harben Krax zommkimm wea ma jo no segn!

39