Page 41 - Flip_2015
P. 41
Da Bodeunfoi
Da Summa wor hoia woitan hoaß,
des hot mit da Umwelt z’toa wia ma jo woas,
boidst frei host, is owa fei,
do kust zun Schwimma an Schworzsee außt sei.
An Haufen Leit di in da Sunn schwitzen
und schaugn, dass unterm Sonnenschirm dasitzen,
vom Springturm donn in See eichihupfen
und sie gegenseitig zur Gaudi eichischupfen.
Auf oamoi wachtelt ebba an Wossa in,
sie schreit um Hilfe a da Mittn drin,
da Bodewaschl start sofort,
und is a glei beim Unfoi dort!
Er ziacht des Opfa schnoi zum Strond,
es send a gach an Haufen Zuaschaua beianond,
oi send gscheit, die Aufregung is groß,
da Badewaschl leg mit da Beatmung los!
Sing “staying alive” vo die Bee Gees, so hod as g'leand,
wei's bei dem Rythmus am besten wieda lewentig weand,
des is owa leida nid da Foi,
aus’n Mund kimmb jedesmoi nua a Wossaschwoi!
Eichiblosen, aufidrucken,
beim Mund aussa an Haufen Wossa spucken,
so gehts dahi a gonze Bois,
bei die Zuaschaua beobacht des a da Huwa Lois.
Der schaugg sie des a Boisei u,
und wei er des ois nit gonz vastehn ku,
muas a die Situation a wenk studian
und des Problem mit’n Wossaspucken analysian:
“So weascht des nix – des find i schod,
des muast onascht mochen, des waar mei Rod,
must’s ans Ufa ziachen, dass da Osch nimma im Wossa waar,
siehst saufts es zwoa no an gonzen Schworzsee laar!”
40
