Page 44 - Flip_2015

Pragmatisch

"Herr Pfarrer, i war heit zum Beichten kemma,
fei, dass sie sich die Zeit fie mi nemma,
i fierat gern a gottgefällig's Leben
und hoffat, dass ma dazu ihr'n Segen geben."

"Des g'freit mi b'sundas, boid i so aussischau
is Beichten soitn fie a so a junge Frau,
is fei dass'd um an Ablass kimmbst - jetz loss amoi hean,
begib dich ruhig in die Obhut deines Herrn!"

"I hu an Freind und der hoast Lois,
mia zwo kennand ins scho a gonze Bois,
mia woitn mitnond Aufgab mochen - vielleicht a wenk schmusen,
auf oamoi g'spiar i sei worme Hond auf mein kloan Busen,

i woas scho, dass ma des eigentlich nit tuat,
hu mi owa nit g'wescht, des Gfüh wor guat!
Gonz noi, wor wia wonn d'Sun durch die Woiken kimmb,
die Knia sand woach won, wira mi in die Arme nimmb.

Die Schmetterling im Bauch wor'n do dahi,
wor eher, wia won i voia Webbsen bi!
I ku eana nit ois vazöhn, wos nocha g'wesen is,
woas nur, es wor wundaschee, des woas i gwies!"

"Liebes Kind, i muas mi decht eimischen!
I red siest bei oana Beicht nit gean dazwischen!
Mia miassn owa in die Gegenwart z'ruggkeahn,
an's sechste Gebot errinat i die gean.

Mia miassn scho beim Thema bleibn!
Da hoast's ja: "Du sollst nicht Unkeuschheit treiben"!
Die Situation wor eindeutig, wie ich meine,
wos es zwoa tu hobbs, passt do genau eine!

Dei Tun bereuen, des war jetzt wichtig
und bis zur Ehe keusch sei - des war hoit richtig,
soidst den Vorfall als einmaligen Ausrutscher betrachten
und die Gesetze Gottes in Zukunft streng beachten!"

"Herr Pfarrer, des wor Liebe und es wor schee,
dass da Herrgott des nit homm wüh, kunnt i nit vastee!
I glabb, dass er gnädig auf ins ochaschaut,
wonn's Unrecht waa, häd a Mann und Frau gonz onasch baut!

43