Page 49 - Flip_2015

Tätowiascht

A jeda vo ins hot in da Jugend amoi an Bledsinn gmocht,
hommb doscht gmoand des is lustig und hommb glocht,
hommb vüh u'gstöht, bereit fie jede Lumparei
und wohn iwaroi wo da Rach aufgonga is dabei.

Is ois vagessen, koana woas mehr wos davu,
krod soim denkt ma adiam amoi no dru.
D'mera Wei kust heimlich driwa lochen
und wundast die soiwa iwa die oidn Sochen!

Heit is des onascht - des is nit guad,
wei ois im Facebook oda im Internet in londen tuad!
Noch'n Saufen, boids an Scheissheisl in speiben,
oda hinta da Parkbonk inna liegen bleiben,

a Foto vom Busen, a Spruch, dass d'Liab is so groß,
boid d'Liab nocha aus is, is moast die Hölle los!
Des gonze Dorf woas, der oder die geh'd fremb,
wei gor koa Anstand mehr des Posting hemmb,

boids hemmungslos und deppat schreibn,
die Kommentare send jo oft zu speibn!
Des ois kust nachlesen - no in hundascht Johr,
gonz gleich ob's foisch oder ob des richtig wor!

Des ois is auf imma und ewig evident,
wei des Internet koa Vazeihen kennt!
Kust des no johrelang lesen, was dazua fiascht:
Du bist damit praktisch elektronisch tätowiascht!

Sie tätowian lossen is ja jetz modern,
die Mandaleit, owa a die Diandln tand des gean!
Auf'd Fiass, auf'd Arm, am Busen, iwan Hois,
vo Blumen bis zu die Nackerten do siggst ois!

Is wia mit'n Internet - do weascht nix vergeben,
jede Sind und jede Bledheit bleib des gonze Leben.
Mia is liawa, nid ois leb unauslöschlich weida,
des Vagessen und Vageben scheint ma do decht g'scheida.

Den oanzigen Voaschtl mecht i vielleicht zun Iwalegn geben,
wei es vaändascht sie oiwei wieder wos im Leben:
Wenn die Partner an Bett in nix mehr tauggn,
nocha kinnans oiwei no nostalgisch Büdl schauggn!

48