Page 56 - Flip_2015

Vawexeln

Solongst a kloas Kind bist, is ois unbeschweat,
do g'freit ma si, boids Weihnacht wead.
Die Ötan woid vo Dir die Winsch dafrogn,
die's nocha an Christkind weidasogn.

Mit'n Schuigeh weand die Ansprüch gressa,
da vasteht ma des Konzept vom Leben bessa,
boid da Oane wos hot, wos Dir no feid,
muast's an Christkind schreiben, damit's des geit!

In da Pubertät is die Zeit nid leicht!
Die Winsch so groß, dass Goid nid reicht,
Gwond, Schuach, a cools Handy zun Telefonian,
an Christkind schreibn, brauchst nit prowian!

Auf oamoi siggst die Briaf, gonz ungelenk,
in denen DEINE Kinda bitten um a G'schenk!
Mit Engei drauf und goidne Stean,
an de Zeit erinnert i mi sovüh gean!

Boids Gleggei leit, die Tür aufgeht,
genau des Gschenk donn untam Christbaam steht,
voi Ungeduid no Stille-Nacht singa,
und nocha zu die Paktln springa.

Boid jeda nocha woas, wo die Gschenk herkemmand,
und mia ins untan Christbaam in die Arme nemmand,
die Zeit steht stüh, do soidst stad sei kinna!
Do stehst do und g'spiast wia die Zachei ocharinna!

Klotzenbrot essen, Keschzen u'zinten,
is oiwei schee, boid ma ins am Tisch zommfinten.
Die Arm ummschlinga, d'Liab in d' Augn segn
und wissen, dass dia, di Du moggst, a die gern megn.

Vorlauta scheene Gedanken bi i a wenk vom Thema o'kemma,
jetzt muas i decht no gach an Zettel nemma,
i bi jo a wenk kinnisch, des soid a so bleibn,
i muas jed's Johr an Christkind a Briafei schreibn:

"A dick's Bankkonto und an schlanken Körpa soids next's Johr o'geben,
dazua vüh G'sundheit - dann häd i ois fie a schees Leben!
Tua die bein Lesen konzentrian, des wa mei Bitt,
wei wennst die zwoa Winsch wieder vatauscht, donn bin i z'ritt!"

55