Page 27 - 2018
P. 27
AUVA
Die Regierung hod si auf die AUVA eing'schossen,
sie miassn spoon, siest weand die Kliniken g'schlossen!
Irgendwie glab i, kriang's des nid recht auf die Reih,
owa des is bei der Politik jo nid gonz nei!
Des Rehazentrum in Häring hüft vüh Leit,
wei's gonz vüh Therapien fie die Patienten geit,
am Laufbandl laffen, mid d'Gummibandl ziang,
tand ois, damit's wieder Kroft und Sichaheit kriang!
Des Essen g'sund, fria schloffen geh,
a wenk Musi losen, an wenk Koschten, des is schee,
im worma Wossa tan's auf a Heilung hoffen,
do hat da Wost den Sepp und an Rudi troffen.
Da Wast is Maura, eam hot's von G'risst ochag'missen,
dabei hod a si die Schuita brochen und des Kreiz varissen.
Hod schiaga nimma steh kinna, hod Therapie,
er hod des G'füh, do im worma Wossa kriangs des hie!
Da Rudi is mid'n Mountainbike an Berg oichig' flogn,
sie hommb eam die Splitta aus'n Owaschenki zogn,
d'Hüft'n brochen, hod an Eisennogl drei,
hod nimma geh kinna, owa im worma Wossa is jetz fei!
Da Sepp hod bein Schwanzaufbinten nid guat g'schaut,
da hod eam d'Rosi mid die Huaf direkt zwischen die Haxen k'haut!
Mid'n Hubschrauwa hommb'sn noch St.Johann oichiflog'n,
do is ondla wos hig'wen, Bua die Stöh is betrog'n!
Fie'n Sex homms eam a Pump einbaut,
muas fleißig üben, weascht owa wieda, wias eichaschaut!
Da Dokta hofft, dass er die Orweit ois Bauer wieda schafft,
a Psychiater red mid eam, des gibb eam Kraft.
Es geht eam hundig, des Soachen brennt,
des ku si gorneamb viestöhn, der des nid kennt!
Vahebb des Haislgeh, wei's so weh tuat,
owa do an worma Wossa, da geht's guad!
27
