Page 49 - 2018

Rachen

Die Beirin hod die Kreida zommtu,
Salbei, Beifuß, Ysop - i hoff dass ich nix vagessen hu
und dass Lavendel, Hagebutten und Kornblumen dazua tuat,
da Wacholder und a poor Brecki Pech schmecken guad.

Z'Maria Himmifoscht wean's g'weicht die Kreida
und sie ramm's donn an Dochboden auffi vorsichtig weida.
Damit's kricht is, wenn die Rauhnächt kemmand,
wo sie's zun Rachen fie's gonze Haus hernemmand.

Vom Heascht ins Pfandl kimmb die Gluad,
boids nimma brennt und d'Oschen weiß is, donn is guad,
die Kreida drauf, von Osten noch Süden, soweit i's woaß
und weida noch Westen und Norden geht die Roas.

Jed's Zimma und vor oim da Stall send wichtig,
boid's so guad riacht, donn is des richtig.
Soid bein Auframa hoiffen, ausmisten, d'Schuidn zoihn
und dass ma mit sich und die ona Frieden schließen vor oihm!

Mäh! Bi i froh, dass die Blauen jetzt bei ins u'schoffen!
Die oide Regierung woid'n s'Rachen bei ins vabiaden, soiche Offen!
Da Bauer hod extrig a Gloswond bein Gong eicha montiascht,
damit ins da Rach bein Fressen nid so irritiascht!

Muh! I riach jo die guaden Kreida so vüh gean!
Da Feinstab is jo wurscht, wei mia eh nid gor so oid wean,
an Fleisch und da Müch weascht'z woi nix toa,
mia brauchen koan Nichtrauchaschutz, wia i hoid moa.

OikOik, es Henna do oben brauchst nid bled lochen,
es ist scho richtig, wos die Türkis-Blauen mochen!
Wenn scho da blaue Rach aufgeht, k'heart des zelebriascht,
a boid ma des Voik damit zu an Bledsinn vafiascht.

Mia megen des, wonn da Rach aufgeht!
Des o'zschoffen finden mia im Stoih herinna bled!
Mia kennand gonz leicht fie die Racher werben,
wei mia jo sowieso vüh frira sterben!

49