Page 46 - 2018

Moosbeeguru

Jetz is wieda Herbst, fie mi die beste Zeit,
wo's so vüh Schees zun U'schaugn geit!
I mog'n liawa wia an Summa
und bi froh, dass die gresste Hitz is wieda umma.
Die Natur zoag si wieda von da scheensten Seit,
wo's wieder unglaubliche Farbenspiele geit,
die bunten Baam spiagln si in an kloan See,
auf die Berg lieg scho der easchte Schnee.
Es geit so vüh Trends fie a scheenas Leben,
Yin Yang, Feng Shui, oi soin in's die Ruhe geben!
Dawei is so oafach, do brauch ma koane Chinesen,
hu s'Yin Yang g'spiascht, is bein Gebra g'wesen!
Yang hoast "Bewegung" - die host bein Auffigeh.
Yin ist "die Stille" - nebn dir die Moosbeestaudn so schee.
Feng Shui is die "Beziehung zur Umwelt", des is nid schwaar,
bei ins passt des no, waa traurig boid's nid so waar!
Auf oamoi hu i ma denkt, i huck mi jetzt oafoch hi,
mitt'n in die Moosbeestauden, wia won i a Guru bi!
Hint die weiß Südketten, davor die Hiegl in Brand,
a poor goiwe Larchen, Herrgottseiten is des a schees Land!
In oana Gegend z'leben, wo ma no "Grias di" sogg
und die Menschen, denen's schlecht geht nochifrogg,
wo d'Kia auf da Oim no friedlicht wiedakoien,
und an Woid geh' kust, as Schwammal hoin,
wo die Bachei klor send, des Wossa so guad,
nid vüh passiascht, wenn ma nid zuspean tuat,
wo d'Sun den Koasa u'leicht, s'Heaschz bleibt fost steh!
Ma ku nua so zommfassen: "Bei ins is so schee!"

46